अर्को चार वर्ष ब्राजिलकै टोलीसँग बस्ने तयार एन्सेलोट्टी

काठमाडौं। ब्राजिल राष्ट्रिय फुटबल टोलीका मुख्य प्रशिक्षक कार्लो एन्सेलोट्टीले ब्राजिलियन फुटबल महासंघ (सीबीएफ) आफ्नो सम्झौता सन् २०३० को विश्वकपसम्म बढाउने तयारीमा रहेको बताएका छन्।

६६ वर्षका इटालियन प्रशिक्षक कार्लो एन्सेलोट्टीले गत वर्ष मे महिनामा ब्राजिलको प्रशिक्षक पद सम्हालेका थिए। उनको सुरुआती सम्झौता सन् २०२६ को विश्वकपसम्मका लागि थियो।

विभिन्न अन्तर्वार्तामा उनले आफू चार वर्षको विश्वकप चक्रसम्म ब्राजिलसँग काम गर्न चाहेको बताएका थिए। सोमबार उनले आफू र सीबीएफ दुवैलाई सम्झौता थप्ने विषयमा कुनै समस्या नभएको बताएका छन्।

एन्सेलोट्टीले कमजोर प्रदर्शनपछि बर्खास्त गरिएका पूर्वप्रशिक्षक डोरिभाल जुनियरको स्थान लिएका थिए। त्यसपछि उनले छिट्टै टोलीलाई विश्वकप छनोट प्रतियोगिताका लागि तयार पार्नुपरेको थियो। उनको नेतृत्वमा ब्राजिलले हालसम्म १४ खेल जितेको, १० खेल बराबरी खेलेको र ९ खेल हारेको छ।

रियो दि जेनेरियोस्थित सीबीएफ मुख्यालयमा आयोजित पत्रकार सम्मेलनमा एन्सेलोट्टीले भने,‘जब दुई पक्षले सँगै अघि बढ्न चाहन्छन् भने समस्या हुँदैन। अर्को विश्वकप अघि वा पछि हामी यो सम्झौता औपचारिक रूपमा बढाउनेछौं।’

उनी त्यहाँ यस महिनामा फ्रान्स र क्रोएसियाविरुद्ध हुने मैत्रीपूर्ण खेलका लागि टोली घोषणा गर्न पुगेका थिए।

एसी मिलान र रियल मड्रिडका पूर्वप्रशिक्षक एन्सेलोट्टी पाँच पटक च्याम्पियन्स लिग जितेका प्रशिक्षक पनि हुन्। उनले ठट्टा गर्दै सीबीएफका पदाधिकारीसँग सम्झौता चाँडै बढाउँदा फाइदा हुने कुरा बताएका थिए।

उनले भने,‘विश्वकप अघि सम्झौता बढाउँदा सस्तो पर्छ, त्यसपछि भने महँगो पर्छ। म धेरै आत्मविश्वासी छु।’