अफ्रिकी फुटबलमा नाटकीय मोड, दुई महिनापछि उपाधि मोरोक्कोलाई

काठमाडौं। अफ्रिकी फुटबलमा ठूलो नाटकीय परिवर्तन भएको छ। २०२५ को अफ्रिका कप अफ नेसन्स (अफकन) को फाइनलको नतिजा दुई महिनापछि परिवर्तन गरिएको छ।

अपिल बोर्डको निर्णयपछि मोरोक्कोलाई च्याम्पियन घोषणा गरिएको हो। फाइनलमा जित हासिल गरे पनि नियम उल्लंघनका कारण सेनेगलले उपाधि गुमाएको छ।

कन्फेडेरेसन अफ अफ्रिकन फुटबल (सिएएफ) ले मंगलबार जारी गरेको विज्ञप्तिमा जनाएअनुसार फाइनलमा सेनेगलको १–० को जितलाई रद्द गरिएको हो। योसँगै मोरक्को ३–० ले विजयी भएको घोषणा गरिएको छ। यससँगै आयोजक मोरोक्को च्याम्पियन बनेको हो।

फाइनलमा के भएको थियो?

गत १८ जनवरीमा भएको फाइनल खेलपछि विवाद सुरु भएको हो। पहिलो चरणमा सेनेगलका फरवार्ड इस्माइला सारको गोल अस्वीकृत गरियो। त्यसपछि खेलको अन्तिम समयमा भिएआरको सहायताले मोरोक्कोले पेनाल्टी पायो।

उक्त निर्णयप्रति असन्तुष्ट हुँदै सेनेगलका प्रशिक्षक पाप थियावले खेलाडीहरूलाई मैदान छाड्न निर्देशन दिए। सेनेगल टोली करिब १५ मिनेटपछि मैदानमा फर्किएको थियो। त्यसपछि खेल अतिरिक्त समयमा पुग्यो।

उक्त समयमा पाप गुएयेले गोल गर्दै सेनेगललाई अग्रता दिलाए। योसँगै खेल १–० ले सेनेगलले जितेको थियो। त्यसपछि टोलीले उपाधि जितेको उत्सव पनि मनाएको थियो।

किन भयो यस्तो निर्णय?

सिएएफको नियमअनुसार खेलका क्रममा मैदान छाड्नु गम्भीर अनुशासन उल्लंघन मानिन्छ। मोरोक्को फुटबल महासंघको अपिलपछि सिएएफ अपिल बोर्डले सेनेगलले खेल ‘फरफिट’ गरेको ठहर गरेको हो।

त्यसैले नियमअनुसार मोरोक्कोलाई ३–० को जित प्रदान गरिएको हो। यस निर्णयसँगै मोरोक्कोले आफ्नो दोस्रो अफकन उपाधि जितेको छ। यसअघि उसले सन् १९७६ मा मात्र उपाधि जितेको थियो।

अन्य निर्णय पनि परिमार्जन

सिएएफले मोरोक्कोका इस्माइल साइबारीमाथि लगाइएको १ लाख डलर जरिवाना खारेज गरेको छ भने उनको प्रतिबन्ध तीन खेलबाट घटाएर दुई खेलमा सीमित गरिएको छ।

साथै मोरोक्कोलाई ५० हजार डलर जरिवाना गरिएको छ (पहिले १ लाख थियो)। भिएआर क्षेत्र नजिकको अव्यवस्थाका कारण लगाइएको १ लाख डलर जरिवाना भने यथावत राखिएको छ।

यता, यस निर्णयसँगै सेनेगलले आफ्नो दोस्रो अफकन उपाधि गुमाएको छ। यसअघि उसले सन् २०२१ मा पहिलो पटक उपाधि जितेको थियो।