एजेन्सी । राखेपको सदस्य सचिवमा रमेश सिलवालको नियुक्तिलाई लिएर नेकपाका धेरै नेताको प्रधानमन्त्री केपी ओलीसंग चित्त दुखाई थियो ।
नेकपाका अधिकांश खेलकुदका नेताहरुले सिलवाललाई सदस्य सचिवमा नलैजान दबाब दिएका थिए ।
पाटी ‘क्याडर’ बाहिरका मान्छेलाई खेलकुदमा लैजान नहुने धेरैको जोड दियो ।
फोनै नउठाउने, पाटी नेताकै कुरा नसुन्ने भन्दै धेरैले सिलवालको नाममा आपत्ती जनाएका थिए ।
नेकपाको धेरै नेता सिलवाललाई ब्यापारी मान्छन् । उनको राजनीतिक आबद्धता र सक्रियतामा नेकपामा नेताहरुले सधै प्रश्न उठाउँछन् ।
उनै सिलवाललाई यसै सातामात्र प्रधानमन्त्री समेत रहेका नेकपा अध्यक्ष ओलीले पुनर्गठित पाटीको केन्द्रिय सदस्यमा मनोनित गरेका छन् । सिलवालले केन्द्रिय सदस्यको रुपमा शहिदको रंक्तरञ्जित सपना पुरा गर्ने शपथ खाएका छन् । गैर राजनीतिक चरित्रको रुपमा नेकपाका खेलकुदमा आलोचित बनेका सिलवाल अब केन्द्रिय रुपमा नेकपाको ‘कमरेड’ बनेका छन् । अझ भनौं शिक्षा ब्यापारीको परिचय बनाएका सिलवालले राजनीतिक रुपमा पनि कित्ता ‘क्लियर’ गरेका छन् ।
संसद विगठन गर्ने प्रधानमन्त्री केपी ओलीको निर्णयसंगै नेकपामा विभाजन आएको छ । प्रधानमन्त्री ओली र प्रचण्ड –नेपाल गरि दुई समुहमा नेताहरु विभाजित छन् ।
खेलकुदमा समेत नेतामाथि कित्ता क्लियर गर्न दबाब छ । प्रारम्भिक रिपोर्ट अनुसार विभाजित नेकपामा खेलकुदतर्फ प्रचण्ड–नेपाल समुह हाबी देखिन्छ ।
खेलकुदमा नेकपाको जनवर्गिय संगठनको रुपमा खेलकुद महासंघ छ । महासंघको संयोजकमा पुरुषोत्तम पौडेल र सह–संयोजक शिव कोईराला छन् । महासंघको एकताले पूर्णता नपाउँदै पाटी विभाजनको अवस्थामा पुग्यो । तर संगठन बनाउने र खेलकुदलाई तलसम्म लैजाने महासंघ प्रचण्ड नेपाल समूहको कब्जामा छ ।
संयोजक पौडेल माधवकुमार नेपाल पक्षका हुन् भने पूर्व माओबादी कोईराला प्रचण्ड पक्षका नेता हुन् । कोईराला हाल राखेपको उपाध्यक्षको समेत छन् । महासंघका ईन्चार्जमा गणेशमान पुन छन् । उनी पूर्व माओबादी हुन् ।
घरेलु खेलकुदमा वर्चस्व राख्ने नेकपाको खेलकुद महासंघमा प्रचण्ड–नेपाल समूहको कब्जा देखिन्छ । महासंघका तीनै जना मुख्य नेताले ‘टिम’ परिवर्तन गरेका छैनन् ।
बुटवल महाधिवेशनबाट पारित भएपछि खेलकुद महासंघको विधिवत गठन भएको हो । महासंघमा सुरुवातमै झलनाथ खनाल तथा माधव समूहको वर्चस्व रहन गयो ।
माओवादीसंग एकिकरण भएपछि खेलकुदमा प्रचण्ड–नेपाल समूह थप शक्तिशाली बनेको छ ।
महासंघसंगै खेलकुद हेर्ने नेकपाको खेलकुद विभाग छ । जसको ईन्चार्ज टोपबहादुर रायमाझी र सह–ईन्चार्ज ठाकुर गैरे हुन् ।
पूर्व माओबादी रायमाझीले टिम परिवर्तन गर्दै ओली पक्षमा लागेका छन् । ओली पक्षले उनलाई जनवर्गिय संगठनको ईन्चार्जको जिम्मेवारी दिएको छ । रायमाझीले टिम परिवर्तन गरेपनि ठाकुर गैरे प्रचण्ड–नेपाल समूहमै छन् ।
ओलम्पिकका श्रेष्ठ प्रचण्ड–नेपाल समूहमा
पछिल्लो केही वर्षयता राष्ट्रिय राजनीतिमा प्रधानमन्त्री ओलीले जे चाहेका छन्, त्यो पुरा भएको छ । अझ भनौ पुरा गरेका छन् । यस्तै चाहना प्रधानमन्त्री ओलीले नेपाल ओलम्पिक कमिटिको चुनावमा राखे, उमेशलाल श्रेष्ठलाई अध्यक्ष बनाउने ।
उनले बालुवाटार बोलाएर जीवनराम श्रेष्ठलाई अध्यक्ष पद उमेशलाललाई खाली गर्न पाटीको तर्फबाट निर्देशन दिए । तर जीवनरामले ओलीको निर्देशन मानेनन् ।
ओलीले खेलकुद मन्त्रालय र राखेपको आड देखाए, जीवनरामले टेरेनन् ।
नभन्दै ओलम्पिकको चुनावमा ओलीका उम्मेदवार उमेशलाललाई पराजित गर्दै जीवनराम दोस्रो पटक अध्यक्षमा निर्वाचित भए । ठट्टानै सही, पछिल्ला तीन वर्षमा प्रचण्ड–नेपालले हराउन नसकेको ओलीलाई जीवनरामले ओलम्पिक निर्वाचनमा धुलो चटाए ।
जीवनराम नेकपामा झलनाथ खनाल पक्षिय नेताको रुपमा चिनिन्छन् । तर वामदेवसंग उनको सम्बन्ध अझ विशेष छ । नेकपाको विभाजनमा वामदेवले कित्ताकाट गरेका छैनन्, तर जीवाराम प्रचण्ड–नेपाल समूहमा लागेका छन् ।
ओलम्पिक नेपाली खेलकुदको एउटा शक्ति केन्द्र मानिन्छ, जीवनराम त्यो शक्तिको हर्ताकर्ता हुन् । प्रतिनिधि सभाका सांसद समेत रहिसकेका जीवनराम विभाजित नेकपामा ओलीविरोधी खेमामा ठडिएका छन् ।
राजकीय पदमा ओली हाबी
खेलकुदको राजकीय पदमा भने ओली हाबी छन् । सत्तामा प्रधानमन्त्री ओली छन् । खेलकुद मन्त्रालयमा ओली पक्षका नेता जगतबहादुर विश्वकर्मा मन्त्री छन् ।
खेलकुदको कार्यकारी निकाय राखेप हो । जसको कमाण्ड रमेश सिलवालले सम्हालेका छन् । सिलवाल भर्खरै ओली पक्षको नेकपाको केन्द्रिय सदस्यमा मनोनित बनेका छन् ।
खेलकुदमा ओली पक्षको खास शक्ति
के घरेलु खेलकुदमा ओली पक्ष कमजोर छ त ?
अह, छैन ।
पाटीको आधिकारिक संगठन खेलकुद महासंघमा ओली पक्ष कमजोर बनेपनि पाटी बाहिर ओलीले खेलकुदको छुट्टै संगठन बनाएका छन्, मदन भण्डारी स्पोर्टस एकेडेमीको नाममा ।
बुटवल महाधिवेशनमा पराजित बनेपछि ओलीले आफ्ना गुटका कार्यकर्ता संरक्षण गर्न मदन भण्डारी फाउण्डेसन खोलेका थिए । त्यसैले एक अंश हो, मदन भण्डारी स्पोर्टस एकेडेमी । जसको संस्थापक अध्यक्ष रमेश सिलवाल हुन् । जो, राखेपमा सदस्य सचिव छन् ।
राखेपको बोर्ड सदस्यमा मन्त्रीपरिषद्ले नियुक्त गरेका पुरेन्द्रबिक्रम लाखे र राजेश गुरुङ्ग समेत फाउण्डेशनमा आबद्ध छन् ।
मदन भण्डारी स्पोट्स एकेडेमीलाई नेकपामा ओली पक्षिय नेता कार्यकर्ताको संगठनको रुपमा लिईन्छ । एकेडेमीले प्रदेश, जिल्ला हुँदै वडासम्म आफ्नो संरचना विस्तार गरेको छ । एकेडेमी खेलकुदमा निकै सक्रिय छ । राष्ट्रिय स्तर हुँदै वडा स्तरसम्म खेलकुदको कार्यक्रम गर्छ । संगठनलाई चलायमान बनाउँछ । नेता, कार्यकर्तालाई जोड्छ ।
एक हिसाबले खेलकुद महासंघ भन्दा अझ सशक्त र आक्रमक तरिकाले एकेडेमीले आफुलाई विकास र विस्तार गरेको छ । यही शक्तिमा प्रधानमन्त्री ओलीले पाटी विभाजनदेखि अबको राजनीतिक यात्रा प्रचण्ड–माधवलाई छाडेर एक्लै हिड्ने आँट गरेको देखिन्छ ।
