प्रशिक्षण गर्न रोक, सुटिङलाई अनुमति 

काठमाडौं । ७ महिना भो, खेलाडी मैदान फर्कन पाएका छैनन् ।

कोरोनाको डर देखाउँदै सरकारले खेल अभ्यासका लागि अनुमति दिएको छैन ।

संक्रमण फैलने डरले राखेपले समेत खेलकुद प्रशिक्षणलाई बन्द गराएर बसेको छ ।

दशरथ रंगशाला सहित खेल स्थलमा खेलाडी प्रवेश र प्रशिक्षण प्रतिबन्ध जस्तै छ ।

कोरोनाका डरले खेलाडीलाई थुनेर राखेको राखेपले गीतको सुटिङका लागि भने दशरथ रंगशाला उपलब्ध गराउने दोहोरो मापदण्ड अपनाएको छ ।

खेलाडी घरमा थुनिएर बसेका छन्, तर राखेप दशरथ रंगशालामा कलाकारको सामूहिक सुटिङलाई अनुमति प्रदान गरेको छ ।

एन्फाले खेलाडीको प्रशिक्षणका लागि अनुमती मागेको महिना दिन बित्न लाग्यो । प्रशिक्षण अनुमतिको फाइल अड्किएर मन्त्रीपरिषद् बैठकसम्म पुग्न सकेको छैन । फाइल अघि बढाउने जिम्मेवारी राखेप र खेलकुद मन्त्रालयको हो ।

खेलकुदका कार्यकारी निकायका नेतृत्वकर्ताले प्रशिक्षण खुलाउन कुनै पहल गर्न सकेका छैनन्, सरकारलाई मनाउन सकेका छैनन् ।

अनौपचारिक छलफलमा कोरोनाको डर देखाउँदै खेलाडीको प्रशिक्षण भन्दा जीवन ठुलो भएको दलील पेश गर्ने गर्छन् ।

कोरोनाको डर देखाउँदै खेलाडीको प्रशिक्षण बन्द गर्ने अनि अर्कोतर्फ रंगशालामा सामूहिक सुटिङको अनुमति दिने दोहोरो मापदण्ड राखेप नेतृत्वकर्ताले अपनाएको छ ।

कोरोना महामारीका कारण विश्वकप छनोटको खेल नरोकिएको भए नेपालले बिहिबार मात्रै चाईनिज ताईपेसंग दशरथ रंगशालामा खेल्ने थियो ।

प्रतियोगिता दोस्रो पटकका लागि स्थगित नभएको भए दशरथ रंगशालामै आगामी सोमबार खचाखच प्यारापिटमा भरिएका दर्शकमाझ नेपालले एसियाली पावर हाउस अष्ट्रेलियाविरुद्ध विश्वकप छनोटको अर्को खेल खेल्ने थियो ।

महामारीको असर विश्वभर फैलिरहदाँ त्यसको असर नेपाली खेलकुदमा समेत परेको छ । जसका कारण विश्वकप छनोटको दोस्रो चरणका बाँकी खेल लगातार दोस्रो पटकका अनिश्चित समयका लागि स्थगित भएको छ ।

छनोट अन्तर्गत नेपालले घरेलु मैदानमा तीन खेल खेल्दैछ । तर एसियाली फुटबल महासंघ (एएफसी)ले प्रतियोगिता सन् २०२१ सम्म स्थगित गरेपछि छनोट प्रतियोगिता अनिश्चित बनेको अवस्था छ ।

छनोट खेल स्थगित बनेपनि एन्फाले दशरथ रंगशालाको मर्मत सम्भार गर्दै आएको छ । प्रतियोगिता स्थगित भएपनि दशरथ रंगशालाको मैदानमा दुबो उमार्न एन्फाले दिन रात मेहनत गरेको छ ।

प्रतियोगिता सर्दै जाने र मौसमका कारण दुबो नटिक्ने समस्या एन्फाका लागि दुर्भाग्यको विषय बन्दैछ । दुबो टिकाउने मुख्य चुनौती एन्फासामु छ ।

रंगशालाको दुबोलाई बिग्रन नदिन एन्फाले लकडाउन र निषेधाज्ञाको समयमा समेत दैनिक मैदानमा ७–८ कर्मचारी लगाएर रेखदेख गराउँदै आएको छ । एन्फाले मैदान मिलाउन थप कर्मचारी समेत झिकाएको छ ।

विगत ८ महिनादेखि दुबो सिगार्न आर्थिक भार बोकेको एन्फाको मेहनतलाई बुधबार भएको एक सुटिङले भने थप चुनौती दिईरहेको थियो ।

बुधबार खेलपाटी टिम दशरथ रंगशाला पुग्दा ‘हे माया सम्झिदा सम्झिदै’ भन्ने गितको सुटिङ भैरहेको थियो ।

कलाकारहरु मैदानको दुबोमा मस्त नाचिरहेका थिए ।

गत शुक्रबार मात्र मैदानमा पुग्दा दुबो टिपिरहेकी एन्फाका एक कर्मचारी भन्दै थिईन्, ‘खेल कहिले हुने हो पत्तो छैन । यो दुबो सिगार्न हामी त घाममै रहनुपर्ने भयो ।’

सुटिङ भैरहेको समय ट्रयाक एण्ड फिल्डमा रहेका म्युजिक भिडियो निर्देशक सरोज ओलीले गीत खेलकुद सम्बन्धितनै रहेका कारण राखेपसँग  अनुमति लिएर सुटिङ गरेको बताए ।

‘राखेपसंग अनुमति लिएर सुटिङ गरेका हौं । गीत खेलकुद सम्बन्धितनै हो । त्यसैले दुई दिनको लागि भाडामा लिएका हौं ।’ ओलीले भने ।

ओलीका अनुसार राखेपले सुटिङका लागि दैनिकी १० हजार भाडामा मैदान दिएको हो ।

दशरथ रंगशाला राखेपको सम्पत्ती हो । यसअघि पनि राखेपले दशरथ रंगशालामै लोकसेवाको परिक्षा, कन्सर्ट, सुटिङ र नेपाल भ्रमण वर्षको उद्घाटन गराएको थियो ।

यस्तै, भाडामा विभिन्न संघ संस्थालाई मैदान दिँदै आएको छ । जुन प्रचलन विश्वभरनै छ । विश्वका ठुला ठुला मैदानमा समेत कन्सर्ट, सुटिङ हुँदै आएका छन् ।

यसपटक फिफा विश्वकप छनोटको तयारी लागि राखेपले एन्फालाई मैदान हस्तान्तरण गरिसकेको छ ।

आफुलाई मैदान हस्तान्तरण गरेर पनि सुटिङका लागि अनुमति दिँदा एन्फाका पदाधिकारी असन्तुष्ट देखिन्छन् ।

‘यत्रो दुख गरेर दुबो बचाईरहेको छौं । हामी पनि दुबोमा हिडेका छैनौं । तर यसरी सुटिङनै गरेर दुबो मासेपछि कसरी जोगाएर राख्नु ?’ एन्फाका एक पदाधिकारीले भने ।

यसअघि मैदान अभावकै कारण नेपालले भुटानमा पुगेर विश्वकप छनोटको होम गेम खेल्न बाध्य भएको थियो । विश्वकप छनोट अन्तर्गत कुवेतविरुद्ध घरेलु मैदानमा हुने खेल फिफा मापदण्ड पुरा नहुँदा न्युट्रल भेन्युको रुपमा भुटानमा पुर्याईएको थियो ।

बिगत ८ महिनादेखि मैदान बाहिर रहेका खेलाडी समेत राखेपको कदमबाट असन्तुष्टि जनाउँदै लज्जाबोध भएको बताउँछन् ।

‘यहि कोरोनाको कारण भन्दै खेलाडी चाही मैदान बाहिर बस्नु परेको छ । खेलाडीले मैदानमा पुगेर खेल्न पाएको छैन । तर त्यहि मैदानमा सुटिङ गर्न त दिनुभएन ।’ राष्ट्रिय टिमका एक खेलाडीले असन्तुष्टि पोखे ।

मैदानमा खेलाडीलाई अभ्यासको स्विकृति नदिने तर सुटिङका लागि मैदान दिने बिषय आफै लज्जाको बिषय भएको ती खेलाडीले बताए ।

‘खेलाडीलाई अभ्यास गर्दा कोरोना लाग्ने भन्दै स्विकृति नदिने तर खेलाडी भन्दा धेरै जम्मा हुने सुटिङलाई चाही अनुमती दिने ? लाज लाग्छ कुरा सुन्दा पनि ।’ उनले भने ।

एन्फाका एक पदाधिकारी सुटिङ जस्तै प्रशिक्षणका लागि पहल गरिदिन राखेपलाई चुनौती दिन्छन् ।

‘जसरी राखेपको नेतृत्वले सुटिङ गर्न स्विकृति दिनुभयो । त्यसै गरि खेलाडीलाई अभ्यासमा फर्काउन पहल गरिदिएको भए राम्रो हुन्थ्यो ।’ उनले भने ।