काठमाडौंं । सन् २०१६ को युरो कप चलिरहेको थियो ।
फ्रान्सले आयोजना गरेको प्रतियोगिताको रौनकता नेपालसम्मै छरिएको थियो ।
सेमिफाइनलमा भिड्दै थिए, क्रिष्टियानो रोनाल्डो सम्मिलित पोर्चुगल र वेल्स ।
ठमेलको एक होटलमा ठुलो पर्दामा खेल देखाउने कार्यक्रम थियो । अथितीको रुपमा राष्ट्रिय फुटबल टिमका सदस्यलाई बोलाईएको थियो ।
भरत खवास, नवयुग श्रेष्ठ, अमृत चौधरी र आदित्य चौधरी राष्ट्रिय फुटबल टिमका सदस्यको रुपमा कार्यक्रममा आएका थिए । मोडलिङ क्षेत्रका चिरपरिचित अनुहार समेत फुटबल हेर्न जम्मा भए ।
मोडलिङ गर्ने पनि फुटबलका प्रशंसक हुन्छन् भनेर कार्यक्रमको आयोजना गरिएको थियो । त्यही भिडमा थिईन्, गिता घिसिङ पनि ।
त्यही आदित्य र गिताको पहिलो भेट भएको थियो ।
सामान्य परिचय बाक्लिदै विवाहको आकार ग्रहण गर्यो । केही हप्ता अघिमात्र दुवैले आधिकारिक रुपमा विवाह बन्धनमा बाँधिए ।
आदित्यले गत वर्षनै गितासँग विवाह गरेका थिए । तर, गिताको परिवार सम्बन्धमा खुसी थिएन ।
तर आदित्यले सर्लाही लगेरै गितालाई गृह प्रवेश गराएका थिए । आदित्यको परिवार नयाँ सम्बन्धबाट खुसी थियो । तर, गिताको परिवारले झण्डै एक वर्षसम्म कुनै प्रतिकृया दिएको थिएन ।
केही हप्ता अघि मात्र गिताको परिवार समेत सम्बन्धलाई लिएर सहमत बन्यो । गिताको परिवारले आदित्य दम्पत्तीको टिकाटालो गरिदिए ।
आदित्य पहिलो पटक ससुराली समेत गए ।
‘यसअघि उहाँहरु आफ्नो रीतिरिवाज अनुसार स्विकार गर्नु भएको थिएन । अब भने उहाँहरु पनि राजी हुनुभयो ।’ मन्द मुस्कानसहित आदित्यले खेलपाटीसँग खुसी साटे ।
राष्ट्रिय टिमबाट तीन उपाधि हात पारिसकेका आदित्य पोर्चुगलका समर्थक हुन् । वेल्समात्र हैन, फाईनलमा फ्रान्सलाई हराउँदै पोर्चुगलले पहिलो पटक युरो कपनै उचाल्यो ।
पोर्चुगलले पहिलो पटक उपाधि हात पारेको समय आदित्यले आफ्नो जीवनसंगिनी फेला पारेका थिए । सम्बन्धको फाइनल खेल भने ४ वर्षपछि जिते ।
एन्फा एकेडेमी उत्पादन आदित्यले यसै सिजन मनाङ मर्स्याङ्दी क्लबबाट घरेलु लिग खेलेका थिए । त्यसअघि उनले एपीएफ र थ्रीस्टारबाट खेलेका छन् ।
घरेलु लिगको डेब्यु भने थ्री स्टार क्लबबाट गरेका हुन् ।
हाल राष्ट्रिय टिमबाट बाहिर रहेको आदित्यले उमेर समूहमा नेपालको प्रतिनिधित्व गर्दै यू–१४, १५, १६, १९ र २३ का प्रतियोगिता खेलेका छन् ।
सन् २०१४ मा प्यालेस्टाईनविरुद्ध खेल्दै आदित्यले राष्ट्रिय टिमबाट डेब्यु गरेका थिए । प्रशिक्षक ज्याक स्टेफानोस्कीले आदित्यलाई विश्वास गर्दै कतार भ्रमणमा लगेका हुन् । त्यसपछि उनले सन् २०१८ को साफ च्याम्पियनसिपसम्म राष्ट्रिय टिमको प्रतिनिधित्व गरेका छन् ।
बंगलादेशमा सेमिफाइनलमा माल्दिभ्ससँग ३–० ले पराजित भएपछि आदित्य विभिन्न कारणले टिम बाहिर छन् ।
नेपालले एएफसी सोलिडारिटी कप, बंगबन्धु गोल्डकप र गुहावटीमा भएको दक्षिण एसियाली खेलकुद प्रतियोगिता साग जित्दा आदित्य नेपाली टिमका मुख्य सदस्य थिए ।
तीनै प्रतियोगिताका मुख्य सेन्टर डिफेन्डर हुन्, आदित्य ।
भर्खरै मात्रै औपचारिक रुपमा विवाह–बन्धनमा बाँधिएका आदित्यलाई पारिवारिक सम्बन्धसंगै फुटबल करियरलाई समेत उकालो लगाउनुपर्ने चुनौती छ ।
बैबाहिक बन्धनमा बाँधिएका आदित्यले तत्काल सन्तानको बारेमा सोचेका छैनन् ।
हाल राष्ट्रिय टिममा आफ्नो स्थान खोजिरहेका आदित्य सन्तान भन्दा राष्ट्रिय टिममा आफ्नो गुमेको स्थान फिर्ता ल्याउने सोचमा छन् ।
‘सन्तानका बारेमा अहिले सोचेको छैन । आफ्नो गुमेको लय र स्थान खोज्न मेहनत गर्छु । युवा टिम रहेको हुँदा धेरैनै मेहनत गर्नुपर्ने हुन्छ । क्लब स्तरमा राम्रो गर्नुछ ।’ आदित्य भन्छन् ।
हाल राष्ट्रिय टिममा आदित्यलाई देवेन्द्र तामाङलाई प्रतिस्थापन गरेका छन् ।
प्रशिक्षक योहान कालिनका प्रिय खेलाडी हुन्, देवेन्द्र । निकै मेहनती र खेलमा शतप्रतिशत दिने देवेन्द्रको स्थान लिनु आदित्यलाई ठुलो चुनौती छ ।
राष्ट्रिय टिम हेरेको लामो समय बितिसक्दा समेत प्रशिक्षक कालिनले आफ्नो प्लेईङ सेट तयार पार्न सकेका छैनन् । जसको फाइदा आदित्यले लिन सक्छन् ।
‘पहिलो पनि देवेन्द्र र म नै प्रतिस्पर्धामा हुन्थ्यौं । मैले खेलिरहँदा उसलाई मौका दिएको थिईन । पहिला क्लबको लागि राम्रो गरेर राष्ट्रिय टिमको लागि तयारी गर्छु । पुनः आफ्नो लय र स्थान फर्काउँछु ।’ उनी भन्छन् ।
तस्बिर- आदित्यको फेसबुक
