काठमाडौं । भदौ शुक्ल तृतीया अर्थात आज हरितालिका तीज । हिन्दु धर्मावलम्बी नारीको महान् चाड । नारीले अघिल्लो रात दर खाएर दिनभर ब्रत बस्ने दिन ।
घर, परिवार, इष्ट मित्र, साथीसंगी संग रमाउने दिन । नजिकैको मन्दिरमा भगवानको आराधना सहित नाचगान गर्ने दिन ।
विश्वभर महामारीका रुपमा फैलिएको कोरोना भाईरस (कोभिड–१९)का कारण तीजका सबै रमाईलो नारीका लागि पर भएका छन् ।
विश्वभर फैलिएको कोरोनाबाट नेपाल पनि अछुतो छैन । नेपालमा समेत हाल तिव्रगतिमा कोरोनाको संक्रमण फैलिरहेको छ । जसका कारण पुनः एक पटक देशभर निषेधाज्ञा जारी गरिएको छ । जसका कारण मानिसहरु घरबाट बाहिर निस्कन पाएका छैनन् । मन्दिरसम्म जाने अवस्था छैन ।
सरकारले अत्यावश्यक काम बाहेक घर बाहिन निस्कन निषेध गरेको छ । भौतिक दुरी अनिवार्य कायम राखेर मास्क लगाउन निर्देशन जारी गरेको छ ।
अघिल्लो वर्ष धुमधामसंग तीज मनाएका महिला खेलाडी तथा पदाधिकारी यसपटक लकडाउनमै थन्किएका छन् । उनीहरुले जमघट गरेर यस पटक तीज मनाउनै पाएनन् ।
गत वर्षको तीजमा अखिल नेपाल फुटबल संघ (एन्फा)को महिला संघले औपचारिक कार्यक्रम आयोजना गर्दै तीज मनाएको थियो । एन्फा भवन सातदोबाटोमा बिहानको समयमा खेलाडीहरु महिला संघका पदाधिकारीसँग नाचगान गरि तीज मनाएका थिए । तर यस पटक भने सो अवसरबाट संघका पदाधिकारी र महिला खेलाडी बिमुख रहे ।
यतिबेला खेलाडीहरु आ–आफ्नै घरमा छन् । उपत्यकामा संक्रमण बढ्दो अवस्थामा छ । त्यसैले उनीहरु रमाईलो गर्न एक अर्काको घरसम्म पुग्ने र जमघट गर्ने अवस्था छैन ।
राष्ट्रिय महिला फुटबल टिमका फरवार्ड सावित्रा भण्डारीको शब्दमा यस पटकको तिज ‘बोरिङ तिज’ हो ।
घरपरिवार टाढा छ, साथीहरुसंग जमघट हुने अवस्था छैन । सोही कारण उनलाई यसपटकको तीज बोरिुङ लागेको छ ।
‘लकडाउनले गर्दा तीज रमाईलो हुन पाएन । परिवार नजिक छैनन् । साथीसंग जाने अवस्था छैन ।’ सावित्राले खेलपाटीसँग भनिन् ।
सावित्रा जस्तै एन्जिला तुम्बाप्पो सुब्वाको अवस्थापनि त्यस्तै छ ।
उनीपनि कोरोनाका कारण घरबाट निस्कन सकेकी छैनिन् । जाने ठाउँपनि छैन ।
‘रमाईलो गर्न त मन हुन्छ । तर समय यस्तो छ । यस्तो बेला कहाँ रमाईलो गर्न जानु ।’ एपीएफ क्लबकी जागिरे सुब्बाले भनिन् ।
महिला भलिबल टिमकी कान्छी खेलाडी उषा भण्डारीको यस पटकको तीज अन्य खेलाडीको भन्दा पृथक छ । उनी नजिकैको मामाघर पुगिसकेकी छिन् । दर खाने, ब्रत बस्ने र मामाघरमै रमाईलो गर्ने उषाको योजना छ ।
‘नजिकै मामाघर छ । यतै आएको छु । संयमित भएर तिज मनाउँछु ।’ उषाले भनिन् ।
नेपाल पुलिस क्लबमा आवद्ध उषाले कान्छी भलिबल खेलाडीको रुपमा आफुुलाई स्थापित गराएकी छिन् । गत बर्ष नेपालगञ्जमा सम्पन्न पीएम कपमा पुलिसले उपाधि हात पार्दा उषा वेस्ट प्लेयर घोषित भएकी थिईन् ।
कोही खेलाडीले भने तीजको समयमा हुने प्रतियोगिता सम्झिएर बसेका छन् । खासै तीज मनाउने नगरेकी प्रतिभा तीजको समयमा हुने भलिबल प्रतियोगितालाई सम्झिरहेकी छिन् । तीज भन्दापनि यस अवसरमा हुने भलिबल प्रतियोगिता छुटेको उनलाई विस्मात छ ।
‘तीज भन्दा पनि तीजको अवसरमा हुने प्रतियोगितामा ध्यान बढि हुन्छ । बच्चैबाट तीजमा प्रतियोगिता खेल्दै आएको हो । यस पटक खेल्न पनि पाएनौं ।’ चोटबाट मैदान फर्कन प्रयासरत प्रतिभा भन्छिन् ।
