काठमाडौं । फिफा विश्वकपको एसिया छनोट अन्तर्गत अष्ट्रेलियाले नेपालबिरुद्धको खेल सार्न प्रस्ताव गरेको छ । विश्वमा महामरीको रुपमा फैलिएको कोरोना भाईरसको कारण देखाउँदै अष्ट्रेलियाले नेपालबिरुद्धको पुर्वनिर्धारित खेल सार्न प्रस्ताव गरेको हाे ।
अष्ट्रेलियाले यसै महिना काठमाडौंको दशरथ रंगशालामा विश्वकप छनोटको दोस्रो लेगको खेल नेपालसंग खेल्दैछ । मार्च ३१ मा नेपाल र अष्ट्रेलिया दशरथ रंगशालामा खेल्ने तय छ ।
त्यसको ५ दिन अघि नेपालले दशरथ रंगशालामै चाईनिज ताईपेसंग विश्वकप छनोटको दोस्रो लेग खेल्दैछ ।
‘अष्ट्रेलियाले कोरोना भाईरसका कारण नेपालसंगको खेल सार्न एएफसीमा प्रस्ताव गरेको छ ।’ एन्फा स्रोतले खेलपाटीसंग भन्यो, ‘खेल सार्न माग सहित उसले एएफसीमा निवेदन दिएको छ ।’
कोरोना भाईरसको बढ्दो जोखिमका कारण नेपाल सरकारले सार्वजनीक कार्यक्रम आयोजना नगर्न अपिल गर्दै आएको छ । सोही अनुसार भिडभाड हुने कार्यक्रम गर्न समेत सरकारले बन्देज लगाएको छ ।
अष्ट्रेलियाको निवेदन र नेपाल सरकारको पछिल्लो बन्देजका कारण विश्वकप छनोटको पुर्व निर्धारित खेल सर्ने सम्भावना बढेर गएको छ ।
‘यही स्थिती रहेको अवस्थामा दशरथ रंगशालामा हुने खेल सर्ने सम्भावना उच्च छ ।’ एन्फाका एक पदाधिकारीले खेलपाटीसंग भने ।
विश्वकप छनोटको खेल तत्काललाई स्थगित गर्न माग गर्दै म्यानमार, कोरिया, अष्ट्रेलिया लगायतका देशले एसियाली फुटबल महासंघ एएफसीमा निवेदन दिएका छन् ।
विश्वका ८० बढी देशमा फैलिसकेको कोरोना भाईरस पछिल्लो समय जापान, ईरान लगायतका देशमा तिव्र गतिमा बढिरहेको छ ।
सोही कारण नेपाल सरकारले समेत देशभित्र सभा, सम्मेलन तथा मानिस जम्मा हुने कार्यक्रम नगर्न सार्वजनीक सुचना जारी गरिसकेको छ ।
विश्वकप छनोट अन्तर्गत अखिल नेपाल फुटबल संघ एन्फाले प्रारम्भिक ३१ सदस्यीय टिम घोषणा गरिसकेको छ ।
घोषित टिमका अधिकांश सदस्य अहिले राष्ट्रिय टिमको प्रशिक्षणमा व्यस्त छन् ।
विश्वकप छनोटको समूह चरणको चारै अवे खेल खेलिसकेको नेपालले अब बाँकी खेल घरेलु मैदानमा खेल्नेछ । दशरथ रंगशाला तयार नभएको अवस्थामा कुवेतविरुद्धको होम गेम नेपालले भुटानमा खेलेको थियो ।
नेपाल पहिलो लेगको खेलमा कुवेतसंग ७–० र दोस्रो लेगमा १–० ले पराजित भएको थियो । यस्तै, अष्ट्रेलियासंग ५–० र जोर्डनसंग ३–० ले पराजित भएको थियो । अवे खेल अन्तर्गत नेपालले चाईनिज ताईपेलाई २–० ले हराएको थियो ।
