इलाम । सहिद स्मारक 'ए' डिभिजन लिग विजेता मछिन्द्र फुटबल क्लब इलाममा जारी छैटौं संस्करणको माईभ्याली गोल्डकप फुटबलको फाइनलमा प्रवेश गरेको छ ।
इलामको टुँडिखेलमा बुधबार भएको पहिलो सेमिफाइनलमा मानेभञ्ज्याङ एफसी दार्जिलिङलाई ३-० गोल अन्तरले पराजित गर्दै मछिन्द्र उपाधि नजिक पुगेको हो ।
मछिन्द्रको जितमा रेजिन सुब्बाले दुई गोल गरे । यस्तै एक गोल सोमिडे एडिलाजाले गरे ।
खेलमा १९ औं मिनेटमा रेजिनको गोलबाट मच्छिन्द्रले अग्रता बनाएको थियो । २१ औं मिनेटमा सोमिडेले रजिन धिमालको कर्नरमा गोल गर्दै मछिन्द्रलाई २-० को अग्रता दिलाए ।
त्यसपछि खेलको ८७ औं मिनेटमा रेजिनले व्यक्तिगत दोस्रो गोल गर्दै मछिन्द्रलाई ३-० को सहज जित दिलाए ।
खेलको म्यान अफ दि म्याच मछिन्द्रका देबेन्द्र तामाङ चुनिए । उनले नगद १० हजार प्राप्त गरे ।
अब मछिन्द्रले उपाधिका लागि आयोजक माईभ्याली र त्रिभुवन आर्मी क्लबबीचको विजेतासँग खेल्नेछ ।
यस अघि मछिन्द्रले क्वाटरफाइनलमा गोर्खा ब्वाईज क्लब रुपन्देहीलाई टाइब्रेकरमा ५-३ गोल अन्तरले पराजित गरेको थियो । यस्तै मानेभञ्ज्याङ एफसीले झापा-११ लाई २-१ ले स्तब्ध बनाएको थियो ।
१० टिम सहभागी प्रतियोगिताको विजेताले नगद ८ लाख तथा उपविजेताले ५ लाख रुपैयाँ पाउने छन् । प्रतियोगिताको उत्कृष्ट खेलाडीले नगद १ लाख २५ हजार प्राप्त गर्ने छन् ।
