काठमाडौं । सहिद स्मारक 'ए' डिभिजन लिग फुटबलमा साविक विजेता मनाङ मर्स्याङ्दी क्लब र थ्री स्टार क्लबले बराबरी खेल्दै अंक बाडेका छन् ।
त्रिपुरेश्वरस्थित दशरथ रंगशालामा शनिबार भएको खेलमा मनाङ र थ्री स्टारले २-२ गोलको बराबरी खेल्दै अंक बाडेका छन् ।
प्रतिस्पर्धात्मक बनेको खेलमा सुरुवाती अग्रता थ्री स्टारले बनाएको थियो । २० औं मिनेटमा भारतीय खेलाडी लालरम्मावियाले गोल गर्दै थ्री स्टारलाई १-० को अग्रता दिलाए ।
हालै थ्री स्टारमा अनुबन्ध भएका लालरम्मावियाले पहिलो खेलमै २० यार्ड टाढाबाट फ्रिकिकमा उत्कृष्ट गोल गरे ।
पहिलो हाफमा १-० ले पछि परेको मनाङ दोस्रो हाफको सुरुवातमै खेलमा फर्कियो । खेलको ४९ औं मिनेटमा अन्जन बिष्टले पेनाल्टीमा गोल गर्दै मनाङलाई १-१ को बराबरीमा ल्याए । आफ्नो डिबक्समा अशोक खवासले अन्जनलाई फउल गर्दै लडाएपछि मनाङले पेनाल्टी पाएको थियो । जसलाई उनले सदुपयोग गरे । थ्री स्टारविरुद्धको गोल अन्जनको यस सिजनको पहिलो गोल हो ।
यस्तै खेलको ६९ औं मिनेटमा अन्जनले व्यक्तिगत दोस्रो गोल गर्दै मनाङलाई २-१ को अग्रता दिलाए । कप्तान कमल श्रेष्ठले करिब ३५ यार्डबाट उपलब्ध गराएको फ्रिकिकमा अन्जनले हेड गोल गरे ।
तर, खेलको ८३ औं मिनेटमा लालरम्मावियाले व्यक्तिगत दोस्रो गोल गर्दै थ्री स्टारलाई हारबाट जोगाए । डिबक्स भित्र पाएको बललाई उनले सहजै गोल गरे । यससँगै लालरम्मावियाले डेब्यु खेलमा थ्री स्टारका लागि दुई गोल गर्न सफल भए ।
खेलमा मनाङका अन्जन म्यान अफ दि म्याच चुनिए ।
थ्री स्टारसँगको बराबरीसँगै मनाङले शीर्ष स्थानमा उक्लने मौका गुमाएको छ ।
बराबरीसँगै मनाङले ७ खेलमा १३ अंक जोडेको छ । मनाङ तेस्रो स्थानमा रहेको छ । १३ अंक जोडेको आर्मी शीर्ष र मछिन्द्र दोस्रो स्थानमा रहेको छ ।
चौंथो स्थानको थ्री स्टारले ७ खेलमा ११ अंक जोडेको छ ।
के भन्छन् प्रशिक्षक ?
मनाङका प्रशिक्षक धनेश्वर प्रजापतिले टिमले राम्रो प्रदर्शन गरेपनि डिफेन्सको गल्तीमा गोल खाएको बताए ।
'योजना अनुसार भएन् । डिफेन्समा ब्यालेन्स मिलेन । क्रसमा गोल खायौं । समग्रमा राम्रो खेल्यौं,' उनले भने ।
थ्री स्टारका मेघराज केसीले तीन नयाँ खेलाडीको आगमनले टिम बलियो भएको बताए ।
'तीन अंक जोड्न सक्थ्यौं । तर, पहिलो हाफमा गोलको अवसर गुमायौं । टिमले विपक्षी हेरेर खेल्ने थालेको जस्तो भएको छ,' उनले भने, 'तीन नयाँ खेलाडीले अट्याक बलियो भयो । हामी उपाधि दौडबाट छुटेको छैनौ ।'
उनले मनाङले पनि शत प्रतिशत खेलेको बताए ।
