काठमाडौं। बंगलादेश महिला टोलीले अन्तर्राष्ट्रिय फुटबलमा आफ्नो परीकथाजस्तो यात्रालाई नयाँ उचाइमा पुर्याएको छ।
बुधबार याङ्गोनस्थित थुवुन्ना स्टेडियममा घरेलु टोली म्यानमारलाई २–१ ले पराजित गर्दै बंगलादेशले पहिलो पटक एएफसी महिला एसियन कपको टिकट सुनिश्चित गर्यो, जुन प्रतियोगिता आगामी मार्चमा अस्ट्रेलियामा हुनेछ।
रंगामटीकी बायाँ खुट्टे खेलाडी रितुपर्ना चक्माले १९औं मिनेटमा फ्रीकिकबाट आएको रिबाउन्ड बललाई गोलमा परिणत गरिन्। ७२औं मिनेटमा उनले बक्सको बायाँ कुनाबाट उत्कृष्ट लेफ्ट फुटेड गोल गरेपछि खेल बंगलादेशको पक्षमा गइसकेको थियो।
म्यानमारले अन्त्यतिर ८९औं मिनेटमा एक गोल फर्कायो। तर, बाँकी समय बंगलादेशको उच्च आत्मविश्वास र गोलकिपर रुपना चक्माको उत्कृष्ट बचाउले इतिहास रच्यो।
यो जितपछि बंगलादेश समूह 'सी' को शीर्ष स्थानमा रह्यो। दुई खेलमा ६ अंक जोड्यो। म्यानमार तीन अंकसहित दोस्रो स्थानमा छ भने बहराइन र तुर्कमेनिस्तानले २–२ को बराबरी खेल्दै १–१ अंक जोडेका छन्। अब अन्तिम खेलमा बंगलादेश तुर्कमेनिस्तानसँग पराजित भए खासै फर्क पर्नेछैन। अर्कोतर्फ म्यानमारले बहराइनलाई हराए तापनि बंगलादेश हेड–टु–हेडमा अगाडि रहने छ।
फिफा र्याङ्किङ्गमा ठूलो अन्तर तर मैदानमा बंगलादेशको दबदबा
फिफा वरीयतामा म्यानमार ५५औं स्थानमा छ भने बंगलादेश १२८औंमा। तर, मैदानमा प्रदर्शनले वरीयता केवल भ्रम रहेको साबित गर्यो। बंगलादेशले यसअघि पनि इन्डोनेसिया र जोर्डनसँग बराबरी खेलेर सुधारको संकेत दिएको थियो।
मुख्य प्रशिक्षक पिटर बटलरले अघिल्लो खेलजस्तै सुरुआती ११ मा कुनै परिवर्तन नगरी टिमलाई आक्रमणात्मक रणनीतिमा मैदान उतारे। तीन डिफेन्डरको बलियो प्रदर्शन, गोलकिपर रुपनाको स्विपर किपिङ शैली र आक्रामक मिडफिल्डले म्यानमारजस्तो बलियो टोलीलाई बारम्बार अफसाइडमा पार्यो।
रुपनाले लामो समय आलोचना खेप्दै आएकी थिइन्। तर, यस खेलमा उनले आफ्नो सानो कदलाई पछाडि पार्दै किपिङमा उत्कृष्टता देखाइन्। यो सफलता आकस्मिक होइन।
सन् २०१० को दशकको सुरुमा बालिका विकास कार्यक्रम, बङ्गमाता गोल्डकपजस्ता योजनाले देशभरबाट प्रतिभा उत्पादन गर्न सहयोग पुर्यायो। त्यसपछि सन् २०२२ र २०२४ मा लगातार दुई पटक साफ महिला च्याम्पियन बनेपछि टोलीको आत्मविश्वास उच्च थियो।
अब बंगलादेश महिला टोली एसिया भरिका उत्कृष्ट ११ टिमसँग खेल्नेछ। यसले सन् २०२७ को महिला विश्वकप र सन् २०२८ को लस एन्जलस ओलम्पिकको छनोटमा सहभागी हुने ढोका पनि खोलिदिएको छ।
तर, ती चरणहरूका लागि अझै कडा मिहिनेत आवश्यक छ। अहिले भने रितु र टोलीका लागि यो विजयको खुसी मनाउने क्षण हो। बंगलादेश महिला फुटबलको गौरवपूर्ण अध्यायको यो प्रारम्भ मात्र हो।
