एजेन्सी । ईङ्लिस प्रिमियर लिग फुटबलमा आज (शनिबार) राति ७ खेल हुँदैछ ।
उपाधि होडमा रहेका म्यान्चेष्टर सिटी र लेस्टर सिटीले प्रतिस्पर्धा गर्दैछन् ।
सिटीले घरेलु मैदान ईतिहाद स्टेडियममा लेस्टरसंग प्रतिस्पर्धा गर्न लागेको हो ।
सिटीलाई लेस्टरविरुद्व जित निकाल्दै अंक तालिकामा सुधार गर्नुपर्ने दबाब छ । सिटी ३५ अंक सहित तेस्रो स्थानमा छ । दोस्रो स्थानको लेस्टरको ३९ अंक छ । शीर्ष स्थानको लिभरपुलको ४९ अंक छ ।
सिटीको सर्वाधिक गोलकर्ता सर्जियो अग्युरो शनिबारको खेलमा फर्कदैछ । उनी करिब एक महिना चोटका कारण मैदान बाहिर रहे ।
सेन्टर ब्याक जोन स्टोनसमेत लेस्टरविरुद्व उत्रन सक्नेछन् । तर डेबिड शिल्भा पुर्ण रुपमा निको भईसकेका छैनन् ।
लेस्टरलाई भने ताजा चोटको समस्या छैन ।
खेलको पुर्व सन्ध्यामा सिटीका प्रशिक्षक पेप ग्वार्डीवालाका सहायक मिकेल अर्टेटाले क्लब छाडे । उनी आर्सनलको रित्त रहेको मुख्य प्रशिक्षकमा नियुक्त भएका छन् ।
‘उनले जान चाहे । यदी तिमीसंग सपना छ भने तिमी रोक्न सक्दैनौ । तिमीले तिम्रो सपनालाई पछ्याउनुपर्छ ।’ ग्वार्डीवालाले भनेका छन् ।
लेस्टरका प्रशिक्षक ब्रेन्डन रोडजर्स सिटीविरुद्वका खेललाई लिएर निकै उत्साहित छन् ।
‘हामीले सिटीविरुद्वको खेललाई नियालिरहेका छौ । हामी विश्वको उत्कृष्ट टिमसंग खेल्न गईरहेका छौ । यो क्षमता देखाउने अवसर समेत हो ।’ उनले भने ।
शीर्ष स्थानको लिभरपुमाथि दबाब बनाउन दुवै टिमलाई जितको विकल्प छैन । पराजित हुने टिमको उपाधि होड कमजोर बन्नेछ ।
शनिबार रातिनै हुने अन्य खेलमा आर्सनल नयाँ प्रशिक्षक मिकेल अर्टेटाको नेतृत्वमा एभर्टनको भ्रमणमा निस्कनेछ । एस्टन भिल्लाले साउथह्याम्टनलाई आतिथ्यता प्रदान गर्दा वर्नली वर्नेमाउथको भ्रमणमा निस्कनेछ ।
यस्तै ब्राईटोनले सेभिल्ड युनाईटेड, न्युक्यासलले क्रिस्टल प्यालेस र नर्विच सिटीले उल्भ्सलाई आतिथ्यता प्रदान गर्नेछ ।
