काठमाडौं। सर्हो गुइरासीले पहिलो हाफमै दुई गोल गर्दै बोरुसिया डर्टमुन्डलाई क्लब विश्वकपको क्वार्टरफाइनलमा पुर्याएका छन्।
राउन्ड अफ १६ को अन्तिम खेलमा डर्टमुन्डले मोन्टेर्रेलाई २–१ ले पाखा लगाएको हो।
अब डर्टमुन्डको यात्रा अझ चुनौतीपूर्ण बनेको छ। उसले क्वार्टरफाइनलमा विश्व च्याम्पियन रियल मड्रिडसँग खेल्नेछ। डर्टमुन्डलाई जित दिलाउने दुवै गोलमा करिम अडेयेमीले उत्कृष्ट असिस्ट दिए।
गुइरासीले १४औं मिनेटमा बायाँ साइडबाट पहिलो गोल गरे। २४औं मिनेटमा पेनाल्टी बक्सको सिमाना नजिकबाट अनमार्क भएका गुइरासीले दोस्रो गोल थपे।
फ्रान्समा जन्मिएका तर गिनिया राष्ट्रिय टोलीबाट खेल्ने २९ वर्षीय गुइरासीले यो प्रतियोगितामा चार खेलमा तीन गोल गरिसकेका छन्। आफ्नो पहिलो सिजनमै डर्टमुन्डका लागि सबै प्रतियोगितामा उनले ३७ गोल गरिसकेका छन्।
अब डर्टमुन्डले शनिबार न्यु जर्सीको इस्ट रदरफोर्डमा रियलको सामना गर्नेछ यसअघि नै युभेन्ट्सलाई १–० ले पराजित गर्दै रियल क्वार्टरफाइनल प्रवेश गरिसकेको छ।
जोब बेलिङघमले २८औं मिनेटमा पहेंलो कार्ड पाएपछि उनले अर्को खेल गुमाउने भएका छन्। रियलविरुद्धको खेलमा उनले आफ्नो दाजु तथा डर्टमुन्डका पूर्वस्टार जुड बेलिङघमविरुद्ध खेल्ने अवसर पाउने थिए।
