एजेन्सी । स्पेनका पूर्व स्ट्राइकर फर्नान्डो टोरेसले व्यवसायिक फुटबलको अन्तिम खेल खेलेका छन् ।
जापानको शीर्ष डिभिजनको क्लब सगन टोसुका स्ट्राइकर टोरेसले शुक्रबार जे लिगमा भिसेल कोबेबिरूद्ध मैदान उत्रदै आफनो व्यवसायिक फुटबल करियरको अन्तिम खेल खेलेका हुन् ।
तर, टोरेसको विदाई खेल सुखद रहेन । टोरेसको अन्तिम खेलमा टोसुलाई कोबेले ६-१ गोलको भारी अन्तरले हराएको छ ।
कोबेका लागि होतारू यामागुची र क्योगो फुरुहासीले दुई दुई गोल गरे । यस्तै आन्द्रे इनिएष्टा र जुन्या तानाकाले एक एक गोल गरे । टोसुका लागि कोबेकै थोमसले आत्मघाती गोल गरे ।
जापानिज लिगमा मैदान उत्रदै फुटबल बुट थन्काएपछि टोरेसले आफ्नो फुटबल यात्रा अद्भुत बनेको बताए । उनले गत जुनमै फुटबलबाट सन्यास लिने घोषणा गरेका थिए ।
'यो एउटा अद्भुत यात्रा हो, यसले मलाई संसारको सबै कुनामा पुर्याएको छ,' टोरेसले प्रेस विज्ञप्तिमा लेखेका छन् ।
३५ वर्षे टोरेस गत वर्ष स्पेनिस क्लब एथ्लेटिको मड्रिडबाट टोसु आएका थिए ।
लिभरपुल र चेल्सीका पूर्व फरवार्ड समेत रहेका टोरेसले एथ्लेटिकोबाटै फुटबल करियर सुरु गरेका थिए । टोरेसले सन् २००१ देखी २००७ सम्म एथ्लेटिकोमा खेलेका थिए ।
सन् २००७ देखी २०११ सम्म टोरेसले इन्ग्लिश क्लब लिभरपुलबाट खेलेका थिए । लिभरपुलमा चार बर्ष बिताएपछि टोरेस अर्को इन्ग्लिश क्लब चेल्सीमा आबद्द भएका थिए । ८ बर्ष इन्ग्लिश क्लबबाट खेलेका टोरेसले ३१४ खेलमा १२६ गोल गरेका थिए ।
सन् २०१५ मा चेल्सीबाट लोनमा इटालियन क्लब एसी मिलन गएका टोरेस मिलानमा एक सिजन खेल्दै सन् २०१६ मा पुनः बाल्यकालको क्लब एथ्लेटिको मड्रिड फर्किएका थिए ।
स्पेनले सन् २०१० को विश्वकप फुटबलको उपाधि जित्दा टोरेस महत्वपूर्ण सदस्य रहेका थिए । स्पेनबाट ११० खेल खेलेका टोरेसले ३८ गोल गरेका छन् ।
