काठमाडौं । नेपाली यू-१९ राष्ट्रिय क्रिकेट टिमका मुख्य प्रशिक्षक विनोद दासले यू-१९ एसिया कप क्रिकेटमा टेष्ट राष्ट्रलाई हराउँदै सरप्राइज दिन चाहेको बताएका छन् ।
मुख्य प्रशिक्षक दासले श्रीलंकामा भदौ दोस्रो साताबाट आयोजना हुने एसिया कपमा टेष्ट मान्यता प्राप्त राष्ट्रहरुको सहभागिता भएपनि नेपालले कडा चुनौती दिने बताए ।
'प्रतियोगितामा टेष्ट राष्ट्रलाई सरप्राइज दिने कोसिस गर्ने छौं,' खेलपाटीसँग कुरा गर्दै प्रशिक्षक दासले भने, 'यसको सम्भव सजिलो त छैन तर हामी सक्दो प्रयास गर्ने छौं र तयार पनि छौं ।'
भदौ १५ देखि २९ गतेसम्म प्रतियोगितामा साविकको विजेता भारतसहित पाँच टेष्ट राष्ट्रको सहभागिता रहनेछ । अन्य टेष्ट राष्ट्रमा आयोजक श्रीलंका, बंगलादेश, अफगानिस्तान र पाकिस्तान रहेका छन् । यस्तै एसोसियट राष्ट्रमा नेपाल, कुवेत र युएई रहेका छन् ।
तर, नेपाली खेलाडीले आफ्नो क्षमता भन्दा माथि उठेर खेलेमा टेष्ट राष्ट्रलाई हराउँन कठिन नहुने प्रशिक्षक दासको भनाई छ ।
'हामी आफ्नो क्षमता भन्दा माथि उठेर खेल्ने कोसिस गर्ने छौं । खेलमा हामी जित्नका लागि खेल्छौं,' प्रशिक्षक दासले थपे, 'हाम्रो यू-१९ टिम सधैं बलियो रहँदै आएको छ । हामीले भारत देखि अफगानिस्तान जस्तो टिमलाई हराएका छौं । क्षेत्रिय प्रतियोगिता पनि जित्दै आएका छौं ।'
सन् २०१७ को संस्करणको एसिया कपमा नेपालले भारतलाई पराजित गरेको थियो । समूह चरणको खेलमा नेपालले भारतलाई १९ रनले पराजित गर्दै इतिहास रचेको थियो । कुनै पनि क्रिकेट खेलमा नेपालले भारतलाई पराजित गरेको त्यो नै पहिलो पटक हो ।
यस संस्करणमा पनि नेपालको प्रदर्शन सन्तोषजनक नै हुने प्रशिक्षक दासले बताए । नेपाली युवा टोलीले पछिल्लो समय देखाएको प्रदर्शनबाट पनि एसिया कपमा नेपालले राम्रो गर्ने दासको भनाई छ ।
'क्रिकेट पहिला जस्तो छैन, टेष्ट राष्ट्रले मात्र सँधै जित निकालोस् । क्रिकेटमा अहिले बढ्दो प्रतिस्पर्धा र उमेर समूहमा नेपाली टोलीको उत्कृष्ट प्रदर्शनले पनि यसपटक हामीले टेष्ट राष्ट्रलाई हराउने योजना बनाएका छौँ,' प्रशिक्षक दासले भने ।
यस्तै प्रशिक्षक दासले अन्य राष्ट्रको खेलाडीको मुख्य खेलाडी, टिमको कमजोरी जस्ता कुराको डाटा उपलब्ध नहुदा टिमको योजनामा केहि समस्या भएको बताए ।
'डाटा एक्सेस कम भएका कारण हामीले टिम बेस प्लानिङ गर्छौं तर व्यक्तिगत खेलाडीको डाटा नहुने भएकाले अलि समस्या परको छ,' दासले थपे ।
त्यस्तै प्रशिक्षक दासले नेपाली टिमले अहिले ब्याटिङमा केन्द्रित भएर तयारी गरिरहेको बताए ।
र, यो पनि ...
एसिया कपको सेमिफाइनल पुग्न गाह्रो छैन !
