काठमाडौं । दक्षिण एसियाली पुरुष यू–१८ साफ च्याम्पियनसिपको तेस्रो संस्करण नेपालमा आयोजना हुँदैछ ।
गत बैशाखमा बसेको दक्षिण एसियाली फुटबल महासंघ (साफ) को बैठकले नेपाललाई प्रतियोगिताको आयोजना गर्ने जिम्मा दिएको थियो ।
यू-१८ साफको जिम्मा पाएसँगै अखिल नेपाल फुटबल संघ (एन्फा) ले प्रतियोगिता हल्चोकस्थित एपीएफ क्लबको मैदानमा आयोजना गर्ने निर्णय गरेको छ ।
एन्फाको मंगलबार बसेको आपतकालीन कार्यसमितिको बैठकले प्रतियोगिता हल्चोकमा गर्ने निर्णय गरेको हो । प्रतियोगिता सेप्टेम्बरमा हुनेछ ।
घरेलु भूमिमा नेपाल साविकको विजेताको हैसियतले मैदान उत्रनेछ । भुटानमा दुई बर्षअघि आयोजना भएको प्रतियोगितामा नेपालले बंगलादेशलाई पराजित गर्दै उपाधि जितेको थियो ।
तर, एन्फाले घरेलु भूमिमा आयोजना हुने प्रतियोगिताका लागि युवा टिमको तयारी अझै सुरु गर्न सकेको छैन । प्रतियोगिता आउँन एक महिना बाँकी रहदा पनि टिमले तयारी सुरु गरेको छैन ।
एन्फाले प्रतियोगिताको लागि भने मुख्य प्रशिक्षकमा चेत नारायण श्रेष्ठ, सहायक प्रशिक्षकमा सनोज श्रेष्ठ र गोलरक्षक प्रशिक्षकमा छन्नु राम चौधरीलाई चयन गरिसकेको छ ।
नेपाली युवा टोलीका मुख्य प्रशिक्षक श्रेष्ठले भने टिमको तयारी यसै साताबाट सुरु हुने बताए । प्रारम्भिक चरणमा ६० खेलाडीलाई बोलाउने तयारी गरेको समेत श्रेष्ठले बताए ।
‘टिमको तयारी यसै हप्ताबाट गर्ने तयारी गरेको छु । प्रारम्भिक चरणमा ६० खेलाडी बोलाएको थिए । एन्फाले ४० बाट माथि नराख्नु भनेको छ । त्यसैले यसलाई मिलाउने प्रयासमा छु,' प्रशिक्षक श्रेष्ठले खेलपाटीसँग भने, ‘हामीलाई तयारीका लागि धेरै समय छैन । त्यसैले हामीले चाडै तयारी सुरु गर्नेछौँ ।’
साफ यू-१८ का लागि नेपालले गत महिना सम्पन्न ललित स्मृति यू–१८ फुटबल च्याम्पियनसिपबाट खेलाडी छनोट गर्नेछ । यस्तै साफ यू–१८ खेल्ने टिमले यू–१९ एएफसी च्याम्पियनसिप छनोट प्रतियोगिता खेल्ने छन् ।
यसअघि साफले पहिलो संस्करण यू–१९ साफ आयोजना गरेको थियो । दोस्रो संस्करणमा त्यसलाई परिमार्जित गर्दै साफ यू–१८ आयोजना गरिएको हो ।
पहिलो संस्करणको साफ यू–१९ सातदोबाटोस्थित एन्फा कम्प्लेक्समा आयोजना भएको थियो । उक्त प्रतियोगिता नेपालले भारतलाई पेनाल्टी सुटआउटमा पराजित गर्दै उपाधि जितेको थियो । भुटानमा भएको दोस्रो संस्करण पनि नेपालले जितेको थियो ।
नेपाल घरेलु भूमिमा आयोजना हुने तेस्रो संस्करण पनि जित्न चाहन्छ । तर, अहिलेसम्म तयार नगर्दा नेपाललाई कठिन हुने देखिएको छ ।
अघिल्लो संस्करण नेपाललाई उपाधि दिलाएका केहि खेलाडी यसपटक पनि देखिनेछन् । रेजिन सुब्बा, अनिल महर्जन, अशिम भुषाल, राजिव लोप्चान यसपटक पनि टिममा रहने छन् ।
-1751593454.webp)
