एजेन्सी । अफ्रिका कप अफ नेसन्सको उपाधि छिनोफानो आज (शुक्रबार) राति हुदैछ । ईजिप्टको कायरो रंगशालामा सेनेगल र अल्जेरिया उपाधिका लागि मैदान उत्रदैछन् ।
खेल भने नेपाली समय अनुसार राति पौने १ बजे सुरु हुनेछ ।
अफ्रिका कपको फाईनलको खेल सुरु हुदै गर्दा सबैको नजर सेनेगलका स्टार साडियो मानेमा हुनेछ । उनीले फाईनल खेलमा सबैको ध्यान खिच्नेछन् ।
प्रिमियर लिग क्लब लिभरपुललाई च्याम्पियन्स लिग दिलाउन महत्वपुर्ण भुमिका निर्वाह गरेका साने देशलाई समेत पहिलो पटक अफ्रिकी महादेशको ठुलो प्रतियोगिता जिताउन चाहन्छन् । त्यसैले त उनले मिल्ने भए च्याम्पियन्स लिगको पदक अफ्रिका कपको उपाधिसंग साट्न तयार देखिएका छन् ।
उनको टिम सेनेगल पहिलो पटक प्रतियोगिताको उपाधि जित्न चाहन्छ ।
सानेकै सहयोगमा लिभरपुलले टोटेनहमलाई हराउँदै च्याम्पियन्स लिगको उपाधि जितेको थियो । उनले अफ्रिका कपको पाँच खेलमा तीन गोल गरेका छन् ।
यता अल्जेरियाका प्रशिक्षक जामेल बेलमाडीले दोस्रो पटक उपाधि उचाल्न सक्दो कोशिश गर्ने बताए ।
‘म सबै अल्जिेरियन जनतालाई भन्न चाहन्छु । म राजनीतिज्ञ होईन । कुनै चमत्कार देखाउने कामदार होईन । न कुनै जादुगर हुँ ।’ उनले भनेका छन् ।
‘तर हामी यसरी लड्ने छौ । जसरी यहाँ सम्म पुग्न लडेका छौ ।’ उनले थपेका छन् ।
दुवै टोली समुह चरणमा भिडेका थिए । सन् १९९० को च्याम्पियन अल्जेरियाले समुह चरणको खेल १–० ले जितेको थियो ।
सेनेगलको मुख्य समस्या भनेको उसले डिफेन्डर कालिदो कौलीबलीलाई दोहोरो पहेलो कार्डका कारण गुमाउनेछ ।
इता अल्जेरिया समेत स्टार खेलाडी रियाद महरेजबाट प्रेरित छ । उनकै उत्कृष्ट फ्रिकिकमा अल्जेरियाले फाईनल यात्रा तय गरेको थियो ।
उनी प्रिमियर लिगको च्याम्पियन क्लब म्यानचेष्टर सिटीका मुख्य खेलाडी हुन् । फाईनल उत्रदै गर्दा अल्जेरियाले महरेजबाट उत्कृष्ट प्रर्दशनको आश राख्नेछ ।
