एजेन्सी । ब्राजिलमा जारी कोपा अमेरिका फुटबलको फाइनल खेल आज (आइतबार) राति हुँदैछ ।
विश्व चर्चित माराकाना रंगशालामा हुने फाइनलमा आयोजक ब्राजिल र पेरुबीच प्रतिस्पर्धा हुनेछ । फाइनल खेल नेपाली समय अनुसार राति १:४५ बजे सुरु हुनेछ । र, फाइनलमा मैदान उत्रदा दुवै टोलीको लक्ष्य च्याम्पियन बन्नु हुनेछ ।
विश्व फुटबलमा छुट्टै इतिहास बनाएको ब्राजिलले पछिल्लो १२ बर्षबाट कुनै उपाधि जित्न सकेको छैन । पेरुविरुद्ध ब्राजिल उपाधि खडेरी तोड्न चाहन्छ ।
ब्राजिलले पछिल्लो पटक सन् २००७ मा कोपा अमेरिका जितेको थियो । र, १२ बर्षपछि पुन: ब्राजिल कोपा अमेरिका घरमै राख्न चाहन्छ ।
कोपा अमेरिकामा ब्राजिल सफल राष्ट्र समेत हो । उरुग्वे र अर्जेन्टिनापछि ब्राजिलले सर्वाधिक धेरै कोपा जितेको छ ।
यस्तै सेमिफाइनलमा बलियो टोली अर्जेन्टिनालाई हराउन सफल ब्राजिल उच्च आत्मबलका साथ मैदान उत्रने छन् ।
यता, पेरु तेस्रो पटक कोपा अमेरिका जित्ने योजनामा हुनेछ । जसका लागि पेरु युवा खेलाडीले भरिएको ब्राजिललाई हराउन चाहन्छ ।
पेरुले हालसम्म २ पटक कोपा अमेरिकाको उपाधि जितेको छ । पेरुले पछिल्लो पटक १९७५ मा उपाधि जितेको थियो । त्यसयता पेरु पहिलो पटक फाइनल पुगेको हो । तर, यस संस्करणमा पेरु ब्राजिललाई स्तब्ध बनाउने लक्ष्यमा हुनेछ ।
सेमिफाइनलमा साविकको विजेता चिलीलाई हराएको पेरु ब्राजिलसँगको खेलमा उच्च मनोबलसहित मैदान उत्रने छ ।
ब्राजिल र पेरु चिरपरिचित प्रतिद्वन्दी हुन् । दुई टोलीबीच हालसम्म ४२ खेल भएको छ । जसमा ब्राजिल हाबी भएको छ ।
ब्राजिलले ३२ खेल जितेको छ भने पेरुले ४ खेल जितेको छ । दुई टोलीबीच ९ खेल बराबरीमा सकिएको छ ।
-1746894755.jpeg)
