काठमाडौं । एसीसी यू-१९ एसिया कप क्रिकेट भदौ १५ देखि श्रीलंकामा सुरु हुँदैछ । १४ दिनसम्म चल्ने प्रेतियोगितामा एसियाका ५ टेष्ट राष्ट्रसहित ८ राष्ट्रले सहभागिता जनाउने छन् ।
गत महिना मलेसियामा सम्पन्न एसीसी यू-१९ इन्टर्न रिजनको उपाधि जितेर नेपाल एसिया कपमा छनोट भएको थियो । अब नेपालले एसिया कपमा भारत, श्रीलंका, बंगलादेश, अफगानिस्तान, पाकिस्तान, कुवेत र युएई जस्ता राष्ट्रसँग प्रतिस्पर्धा गर्नेछ ।
यस पटकको एसिया कप नेपालको लागि विश्वकप जत्तिकै ठुलो प्रतियोगिता हुनेछ । किनकि नेपाल आईसीसी यू-१९ विश्वकपका लागि छनोट हुन असफल भईसकेको छ । अब नेपालका युवा खेलाडीले खेल्ने ठुलो प्रतियोगिता यहिँ नै हुनेछ ।
गत वैशाखमा मलेसियामै सम्पन्न यू-१९ विश्वकप छनोटमा यूएईसँग डिएल पद्दतिको आधारमा १ रनले पराजित भएसँगै नेपालको विश्वकप यात्रा सकिएको थियो । योसँगै नेपालले पहिलो पटक लगातार दुई संस्करणको यू-१९ विश्वकप गुमाएको हो ।
विश्वकप पुग्न असफल भएपनि नेपाल एसिया कपमा भने सहजै छनोट भयो । नेपालले फाइनलमा हङकङलाई ६ विकेटले पराजित गर्दै उपाधिसहित एसिया कपको यात्रा तय गरेको थियो ।
यू-१९ एसिया कप नेपाली खेलाडीका लागि निकै महत्वपूर्ण रहेको छ । किनकि एसिया कपको प्रदर्शनले नेपाली यूवा खेलाडीको स्तर देखिनेछ ।
नेपाली राष्ट्रिय टोलीका मुख्य प्रशिक्षक विनोद दासले यस प्रतियोगिता आफ्नो यूवा खेलाडीको परिक्षाको रुपमा हेरेको बताउँछन् ।
'हाम्रो स्तर के हो भन्ने यहि प्रतियोगितामा थाहा हुन्छ,' प्रशिक्षक दास भन्छन् , 'टेष्ट राष्ट्रसंग खेल्दा हाम्रो बलियो पक्ष र सुधार गर्नु पर्ने कुरा हामीले राम्रोसंग थाहा पाउछौं ।'
यू-१९ टिम राष्ट्रिय टिमको एक हिस्सा समेत हो । यू-१९ टोलीमा गरेको प्रदर्शनबाट अधिकांस खेलाडीले राष्ट्रिय टिमको ढोका खोल्दै आएका छन् ।
नेपाली राष्ट्रिय टिममा अहिले रहेका अधिकांस खेलाडी यू-१९ टिमबाट आएका खेलाडी छन् । कप्तान पारस खड्का, ज्ञानेन्द्र मल्ल, सन्दीप लामिछाने, दिपेन्द्र सिंह ऐरी, शरद भेषवाकर, बसन्त रेग्मी लगायतका खेलाडी यू-१९ टोलीबाटै आएका हुन् ।
हाल नेपाली यू-१९ टोलीमा रहेका अधिकांस खेलाडीले अन्तिम पटक उमेर समूहको प्रतियोगिता खेल्नेछन् । त्यसैले धेरै यूवा खेलाडीका लागि यस प्रतियोगिता राष्ट्रिय टिमको ढोका ढकढकाउने समय हुनेछ । जसको मापन यस प्रतियोगितामा उनीहरुले गर्ने प्रदर्शनबाट हुनेछ । हाल टिमका कप्तान रहेका रोहित कुमार पौडेल, पवन सर्राफ, सन्दीप जोराले भने राष्ट्रिय टिमबाट खेलिसकेका छन् ।
नेपालले आगामी असोज १८ देखि ओमानमा पाँच राष्ट्रबीच हुने टी-ट्वान्टी क्रिकेट प्रतियोगिता खेल्दैछ । उक्त प्रतियोगिताको लागि टिममा स्थान बनाउन पनि यूवा खेलाडीका लागि एसिया कप महत्वपूर्ण हुनेछ।
एसिया कपमा नेपालले केहि उत्कृष्ट नतिजा ल्याएको इतिहास पनि रहेको छ । सन् २०१७ को संस्करणमा नेपालले भारतलाई पराजित गरेको थियो । समूह चरणको खेलमा नेपालले भारतलाई १९ रनले पराजित गर्दै इतिहास रचेको थियो । कुनै पनि क्रिकेट खेलमा नेपालले भारतलाई पराजित गरेको त्यो नै पहिलो पटक हो ।
भारतविरुद्धको उक्त प्रदर्शनले नेपालले भारतमा त्रिदेशीय सिरिज खेल्ने मौका पाएको थियो । सिरिजमा नेपाल, अफगानिस्तान र भारतको दुई टिम रहेको थियो ।
त्यसैले युवा टिमको एसिया कपको प्रदर्शनले नेपाली क्रिकेटको भविष्य समेत कोरिने प्रशिक्षक दासको बुझाई छ ।
'भारतलाई पराजित गरेसंगै हामीलाई त्रिदेशीय सिरिजका लागि निम्तो दिएको थियो,' प्रशिक्षक दासले भने, 'हाम्रो यस पटकको प्रदर्शनले हाम्रो क्रिकेटको भविष्यको बाटो कोर्नेछ ।'
-1751597995.webp)
-1751593454.webp)
