काठमाडौं । कोभिड–१९ (कोरोना)बाट संक्रमित राष्ट्रिय स्क्वास टिमका प्रशिक्षक हिरा बहादुर थापाले भाईरससंग लड्दा युद्ध जितेको महशुस भएको बताएका छन् ।
संक्रमित प्रशिक्षक बिगत १७ दिनदेखि घरमा एकान्तवासमा रहेका छन् । उनले स्वास्थ्यमा भाईरसको कुनै लक्षण देखा परेको छैन । उनले भाईरसको कुनै लक्षण देखा नपर्दा आफुलाई एउटा युद्धको लडाईमा सफल भएको अनुभुती सुनाए ।
सोमबार खेलपाटीसँग उनले भने, ‘मलाई केहि भएको छैन । म पहिलो जस्तो छु, त्यस्तै छु । मलाई ठिक भैसकेको छ । अहिले रोगलाई जितिसके जस्तो लाग्छ । एउटा युद्ध जितेको महशुस भएको छ ।’
हिरा २०६० साल यता राखेपमा कार्यरत छन् । उनी राखेपका करार प्रशिक्षक हुन् । कोरोना संक्रमण देखिएसँगै उनी स्क्वास भवनमै एकान्तबासमा छन् ।
हिरालाई साउन २५ गते कोरोना पोजिटिभ देखिएको हो । संघकै उपाध्यक्ष मनोज बहादुर श्रेष्ठलाई कोरोना देखिएसँगै हिराले स्टार हस्पिटलमा पुगेर स्वाव परिक्षण गराएका थिए । अनि उनमा कोरोना पुष्टि भयो ।
एकान्तवासमा रहेका हिराले क्वारेन्टिनमा बस्दा जेलमा बसेको जस्तो अनुभुती भएको उल्लेख गर्दै आफुले सबै सकारात्मक रुपमा लिएको उल्लेख गरे ।
‘क्वारेन्टिनको बसाई जेलको जस्तै हुने रहेछ । तरपनि मनमा त्यस्ता प्रकारका नकारात्मक सोच लिईन । दुई हप्ता क्वारेन्टिनमा बस्न पाए ठिक हुन्छु भन्ने थियो । सबैले मनोबल उच्च राख्न सुझाब दिनुभएको थियो । सफल भए ।’ ४५ सालयता व्यवसायीक रुपमा स्क्वासमा लागेका हिरा भन्छन् ।
घरमै एकान्तवासमा रहेका हिराको स्वास्थ्यमा कुनै समस्या देखिएको छैन । कोरोनाको कुनै लक्षण पनि छैन । न त उनलाई हस्पिटलमा लगिएको छ । उनले कुनै औषधि पनि लिएका छैनन् । हस्पिटलले फोनबाटै उनको स्वास्थ्य अवस्थाबारे जानकारी लिईरहेको छ ।
‘कुनै प्रकारको औषधी खाएको छैन । चेकअप गर्नुपरेको पनि छैन । हस्पिटलबाट आउनुपनि भनेको छैन । हस्पिटलबाट सम्पर्क गरिरहनु भएको छ ।’ हिराले भने ।
सुरुवातमा कोरोनबारे डरलाग्दा समाचार सुनेपनि आफु संक्रमित भएपछि खासै नराम्रो परिस्थितीको सामाना गर्नु नपरेको हिराको कथन छ ।
‘सुरुमा इटालीको कुरा सुन्दा भयानक हुन्छ, गाह्रो हुन्छ भन्ने सुनेको थिए । तर आफैलाई पोजिटिभ हुँदा खासै खतरनाक जस्तो हैन भन्ने लाग्यो । भाइरसले मलाई धेरै असर नगरेको पनि हुन सक्छ । खाना–पिन सहित दैनिक जिवनयापन सुरक्षित बनाए रोग आफै निको हुने रहेछ ।’ उनले आफ्नो अनुभव सुनाए ।
उनले संक्रमण जो कोहीलाई फैलन सक्ने भएकाले कसैमाथि भेदभाव नगर्न आग्रह गरे । उनले सबैलाई सतर्क रहेर बलियो आत्मबल बनाउन सुझाव दिए ।
‘यो रोगले मेरो र तेरो भन्दैन । सबैलाई सामान ब्यवहार गर्छ । लागेको छैन भने सतर्क रहौं । लागेको छ भने आत्माबल बलियो बनाउ ।’ उनले भने ।
हिराको प्रशिक्षणमा नेपालले १३ औं दक्षिण एसियाली खेलकुद (साग)प्रतियोगितामा दुई कास्य जितेका थियो । टिम प्रतिस्पर्धातर्फ महिला र पुरुष दुवै टिमले नेपाललाई कास्य पटक जिताएका थिए ।
-1752288200.webp)
