काठमाडौं । नेपालको कराँतेका लागि शनिबारको दिन, ऐतिहासिक दिन ।
त्यो भन्दा नि एरिका गुरुङ र नेपालका लागि सम्झिरहने दिन ।
नेपालले १९ औं एसियन गेम्सको समापन समारोहको अघिल्लो दिन कराँतेबाट फाइनल खेल्यो । उपाधि भिडन्तमा नेपाल हारेपनि एरिका गुरुङले कराँतेका लागि रजत पदक हात पारिन् ।
प्रतियोगिताको सकिने दिन आउदै गर्दा नेपाली टोली लगभग धेरै खेलबाट आश मारिसकेको थियो । बंगलादेशलाई हराएर कबड्डीको महिला टिमले काँस्य जितेपनि अन्य खेलाडीको प्रर्दशन र नतिजा गर्व गर्न लायक केही थिएन ।
शनिबार कराँतेको ६८ केजीमाथिको तौल समूहको फाइनल खेल्दै एरिकाले नेपालको आशालाई एकाएक बढाईदिईन् ।
अनुभवले तिखारिएका खेलाडीसमक्ष एरिका फाइनलमा खासै जम्न भने सकिनन् । उनको पनि अनुभव र थोरबहुत क्षमताले मार त खायो । तर नेपाली कुनै खेलाडीले लामो समयपछि व्यक्तिगत स्पर्धामा रजत पदक जितेर नेपालको शान एसियाली एरिनामा चम्काएकी छिन् ।
‘उनीहरुको अनुभवल बोल्छ । मैले आफ्नो उत्कृष्ट दिएकै हो । उसले राम्रो खेल्यो । सायद म चुके हुला । त्यसलाई अब सुधार गर्नुपर्छ ।’ फाइनल गुमाएकी एरिकाले भनिन् ।
‘हार भन्दापनि मैले पाठको रुपमा लिएको छु । यसले प्रेरणानै दिन्छ ।’ एरिकाले थपिन्, ‘अब अझ कडा मेहनत गर्ने हो । धेरै कुरा सिकेको छु ।’
एरिकाका प्रशिक्षक कुशल श्रेष्ठले नेपालले प्राप्त गरेको पदकमा खुसी ब्यक्त गरे ।
‘जोसँग फाइनल खेले । उनीहरुकै भिडियो हेरेर अभ्यास गरेका हुन् । चार–पाँच पटक विश्व नम्बर वान भएका खेलाडीलाई दबाबमा राखेर जसरी खेले, यसले हाम्रा खेलाडीमा क्षमता छ भन्ने देखिन्छ । यसलाई राखेप, सरकारले आगामी दिनमा निरन्तरता दिनुपर्छ ।’ कुशलले भने ।
‘अर्को पटक गोल्ड नआउने भन्ने त रहेनछ । आउन सक्ने रहेछ त । गोल्ड मेडल भन्दा एक स्टेप ब्याक थियौं । एकदमै खुसी लागेको छ ।’ कुशलले थपे ।
नेपालको कराँते टिम जाकर्तामा लामो प्रशिक्षण पश्चात चीन लागेको हो । त्यसअघि नेपालको कराँते टिमले १० औं संस्करणको सितेरियो कराँते च्याम्पियनसिप खेल्ने अवसर पाएको थियो । सोही प्रतियोगितामा नेपालकी एरिका गुरुङले नेपालका लागि स्वर्ण पदक जितेकी थिईन् ।
-1746755007.webp)
