काठमाडौं । सहिद स्मारक 'ए' डिभिजन लिग खेलिरहेका १० क्लबले लिग सकिएपछि मात्र आफ्ना खेलाडीलाई राष्ट्रिय टिमको बन्द प्रशिक्षणमा पठाउने भएको छ ।
लिग खेलिरहेको १० क्लबले बिहीबार प्रेस विज्ञप्ति निकाल्दै लिगपछि मात्र आफ्ना खेलाडीलाई राष्ट्रिय टिमको बन्द प्रशिक्षणमा पठाउने निर्णय गरिएको जनाएको छ ।
भारतमा आयोजना हुने साफ च्याम्पियनसिपका लागि नेपाली राष्ट्रिय टोलीका मुख्य प्रशिक्षक भिन्सेन्जो अल्बर्टो एनेसेले ३० सदस्यीय प्रारम्भिक टोली घोषणा गरिसकेका छन् ।
तर, क्लबले लिग नसकी खेलाडी रिलिज नगर्ने भएको छ ।
यस्तै १० क्लबले जारी लिगमा खेलाडी र पदाधिकारीले कालो पट्टि बाधेर खेललाई निरन्तरता दिने निर्णय गरेको छ ।
अखिल नेपाल फुटबल संघ (एन्फा) ले दोस्रो किस्ताको तयारी खर्च, खेलको म्याच मनि, म्याच बल, खेलाडीले पाउनु पर्ने म्यान अफ दि म्याच रकम एन्फाले अहिलेसम्म नदिएको कारण बिरोध स्वरूप क्लबहरुले यस्तो निर्णय गरेको जनाएको छ ।
एन्फाले 'ए' डिभिजन क्लबलाई तयारी खर्च स्वरूप पहिलो किस्तामा १५ लाख, दोस्रो किस्तामा १० लाख र तेस्रो किस्तामा ७ लाख ५० हजार दिने निर्णय गरेको थियो। पहिलो किस्ताको रकम भने क्लबले पाईसकेका छन् ।
यस्तै एन्फाले हरेक खेलको विजेतालाई म्याच मनि वापत ५० हजार, खेल बराबरी भएका २५-२५ हजार र म्यान अफ दि म्याचलाई १० हजार दिने निर्णय गरेको थियो।
