काठमाडौं । आईसीसी यू-१९ एकदिवसीय विश्वकप क्रिकेटमा नेपालको गर्विलो इतिहास रहेको छ । यू-१९ विश्वकपको १२ औं संस्करण पुरा गर्दा नेपालले ७ पटक सहभागिता जनाईसकेको छ ।
युवा खेलाडीको पहिचान गराउने यू-१९ विश्वकपको १३ औं संस्करण दक्षिण अफ्रीकामा अर्को बर्ष आयोजना हुँदैछ । र, यू-१९ विश्वकपका लागि एसिया छनोट शुक्रबारबाट मलेसियामा सुरु हुँदैछ ।
मलेसियामा आयोजना हुने एसिया छनोटमा नेपालसहित ६ टोलीले प्रतिस्पर्धा गर्दैछन् । छनोटमा नेपालसहित, मलेसिया, सिंगापुर,युएई,कुवेत र ओमनले प्रतिस्पर्धा गर्ने छन् ।
सिंगल राउण्ड रोबिनका आधारमा हुने छनोटको शीर्ष टोलीले सन् २०२० मा दक्षिण अफ्रीकामा आयोजना हुने विश्वकपमा स्थान बनाउने छन् ।
एसिया छनोटका लागि नेपाली युवा टोली मलेसिया पुगिसकेको छ । नेपालले शुक्रबार सिंगापुरविरुद्ध मैदान उत्रदै एसिया छनोटको सुरुवात गर्नेछ ।
नेपाल र सिंगापुरबीचको खेल सिलान्गोर टर्फमा हुनेछ । सिंगापुरविरुद्ध मैदान उत्रन नेपाल तयार रहेको छ ।
राष्ट्रिय टोलीका नियमित सदस्य रोहित पौडेलको कप्तानीमा रहेको नेपालले आठौं पटक विश्वकप खेल्ने योजना बनाएको छ । सिंगापुरविरुद्ध जित निकाल्दै नेपाल आफ्नो योजना साकार बनाउन लागि पर्नेछ ।
'हामी आत्मविश्वासी छौं किनकि हामीले १५ दिन भारतमा प्रशिक्षण गरेका थियौं । जहाँ हामीले नेपालमा नपाएका सुविधा एकै ठाउमा पायौं,' नेपाली टोलीका मुख्य प्रशिक्षक विनोद दासले छनोटबारे भने, 'खेलाडीले अभ्यास देखाएका कुराले विश्वास छ कि प्रतियोगितामा हाम्रो राम्रो हुनेछ ।'
विश्वकप छानोटमा नेपालले उच्च प्रदर्शन गर्दै आईरहेको छ । यू-१९ विश्वकपको ईतिहासमा नेपालले ३ पटक मात्र विश्वकप छनोट चरण पार गर्न सकेन । नेपालले सन् २०१८, २०१४ र २०१० मा विश्वकप खेल्ने अवसर गुमाएको थियो ।
यस पटक नेपालको लागि विश्वकपमा छनोट हुने अवसर रहेको छ । यू-१९ टोलीका सदस्यलाई पनि विश्वकप खेल्ने चाहना छ । त्यसैले नेपाल विश्वकपमा छनोट हुन हर प्रयास गर्ने छ ।
नेपाली टोलीका कप्तान रोहित आफ्नो कप्तानीमा नेपाललाई विश्वकपको बाटो डोर्र्याउन चाहन्छ ।
'मेरो नेतृत्वमा नेपाली टोलीलाई विश्वकपमा छनोट गराउ भन्ने चाहना छ । हामीले तयारी समेत राम्रो गरेका छौं,' कप्तान रोहितले भने, 'विश्वकपमा छनोट हुन हाम्रो लागि यो राम्रो अवसर हो ।'
नेपालले यू-१९ विश्वकपमा सात पटक प्रतिस्पर्धा गर्दा आठौं स्थान भन्दा माथि उक्लन सकेको छैन । पहिलो सहभागिता र सन् २०१६ मा नेपालले आठौं स्थान हात पारेको थियो ।
तर, नेपालले यू-१९ विश्वकपमा सधै उत्कृष्ट प्रदर्शन गर्दै आएको छ । नेपालले विभिन्न टेष्ट राष्ट्रलाई समेत पाखा लगाउँदै आएको इतिहास छ । नेपालले विश्वकपमा जिम्बाबे, बंगलादेश, आयरल्याण्ड, न्युजिल्यान्ड र दक्षिण अफ्रिका जस्ता राष्ट्रलाई पराजित गरिसकेको छ ।
एसिया छनोटमा नेपालको खेल कहिले ?
विश्वकपमा नेपालको प्रदर्शन कस्तो ?
-1746755007.webp)
