एपीएफ र न्यू डाइमण्डको विजयी सुरुवात

काठमाडौं । सशस्त्र प्रहरी महानिरीक्षक छैठौं राष्ट्रिय खुुल्ला महिला भलिबल प्रतियोगितामा आयोजक एपीएफ क्लब र न्यू डाइमण्ड एकेडेमीले विजयी सुरुवात गरेका छन् ।

हल्चोकस्थित एपीएफको कोर्टमा सोमबार एपीएफले त्रिभुवन आर्मी क्लबलाई २५–१७, २५–१३ र २५–२० को सोझो सेटमा पराजित गर्दै विजयी सुरुवात गरेको हो ।

यस्तै न्यू डाइमण्डले नेपाल पुलिस क्लबलाई २५–२३, १४–२५,२५–१५ र २५–१५ को सेटमा पराजित गर्दै विजयी सुरुवात गरेको छ ।

महिला भलिबलतर्फ ६ टोलीले प्रतिस्पर्धा गरिरहेका छन् । भलिबलमा आयोजक एपीएफ,त्रिभुवन आर्मी र नेपाल पुलिस क्लब, न्यू डायमण्ड एकेडमी, जावलाखेल भलिबल प्रशिक्षण केन्द्र र ढोरपाटन स्पोर्ट्स क्लबले प्रतिस्पर्धा गर्ने छन् ।

विजेताले २ लाख ५० हजार नगद पाउँदा उपविजेताले १ लाख २५ हजार प्राप्त गर्ने छन् । यस्तै तेस्रोले ५० हजार पाउने छन् ।

विधागततर्फ उत्कृष्ट स्पाईकर, उत्कृष्ट सर्भर, उत्कृष्ट डिफेन्स, उत्कृष्ट ब्लकर, उत्कृष्ट सेटर र उत्कृष्ट प्रशिक्षकले जनही ५ हजार पाउने छन् ।