अन्तत: हेर्न पाइने भयो भारत–पाकिस्तानको बहुप्रतीक्षित भिडन्त !

काठमाडौं। टी–२० विश्वकपको समूह चरणमा भारतसँग खेल्ने तय भएको पाकिस्तानले अन्ततः बहिस्कारको निर्णय फिर्ता लिएको छ।

बंगलादेशको समर्थनमा भारतविरुद्धको खेल नखेल्ने अडान लिएको पाकिस्तान अब निर्णयबाट पछि हटेको हो। यससँगै आगामी १५ फेब्रुअरीमा श्रीलंकाको कोलम्बोमा भारत–पाकिस्तानबीच भिडन्त हुने निश्चित भएको छ।

पाकिस्तान सरकारले सामाजिक सञ्जाल एक्स (एक्स) मा गरेको एक पोस्टमार्फत जानकारी दिँदै भनेको छ,‘अर्जित उपलब्धि र मित्र राष्ट्रहरूको अनुरोधलाई ध्यानमा राख्दै भारतविरुद्ध खेल्न पाकिस्तान टोलीलाई अनुमति दिइएको छ।’

गत केही दिनयता टी–२० विश्वकपको सबैभन्दा चर्चित र आर्थिक रूपमा महत्त्वपूर्ण मानिने यस खेलमा पाकिस्तानलाई फर्काउने प्रयास तीव्र बनेको थियो। यसका लागि पाकिस्तान क्रिकेट बोर्ड (पीसीबी), बंगलादेश क्रिकेट बोर्ड (बीसीबी) र अन्तर्राष्ट्रिय क्रिकेट परिषद् (आईसीसी)बीच लगातार छलफल भइरहेको थियो।

सोमबार साँझतिर पीसीबी अध्यक्ष महसिन नकवीले भारतविरुद्धको खेलबारे २४ देखि ४८ घण्टाभित्र अन्तिम निर्णय आउने संकेत दिएका थिए। त्यसको केही समयअघि नै आईसीसीले बंगलादेशसम्बन्धी आफ्नो अडानमा लचकता अपनाउने घोषणा गरेको थियो।

उल्लेखनीय कुरा के छ भने भारत यात्रा गर्न अस्वीकार गरेकै कारण बंगलादेशलाई टी–२० विश्वकपबाट बाहिर राखिएको थियो। तर, पछि आईसीसीले बंगलादेशमाथि कुनै जरिवाना नलगाइने स्पष्ट पार्दै सन् २०२८–२०३१ चक्रमा एक अतिरिक्त आईसीसी प्रतियोगिता आयोजना गर्ने अधिकार प्रदान गरेको छ।

यस निर्णयपछि बीसीबीले एक विज्ञप्ति जारी गर्दै पाकिस्तानलाई समर्थनका लागि धन्यवाद दिएको छ र भारतविरुद्धको निर्धारित खेलमा सहभागी हुन पाकिस्तानलाई आग्रह गरेको थियो। त्यसैको परिणामस्वरूप अब क्रिकेटप्रेमीले बहुप्रतीक्षित भारत–पाकिस्तान भिडन्त हेर्न पाउने भएका छन्।