सुपर ८ नजिक न्युजिल्यान्ड

काठमाडौं। टिम सेफर्ट र फिन एलेनको अविजित तथा विस्फोटक साझेदारीसँगै न्युजिल्यान्ड आईसीसी टी–२० विश्वकपको सुपर ८ नजिक पुगेको छ।

मंगलबार सम्पन्न खेलमा न्युजिल्यान्डले संयुक्त अरब इमिरेट्स (युएई) लाई १० विकेटले हराएको हो। युएईले दिएको १७४ रनको लक्ष्य पछ्याएको न्युजिल्यान्डले कुनै पनि विकेट नगुमाई १५.२ ओभरमै १७५ रन बनाउँदै खेल आफ्नो पक्षमा पार्‍यो।

जितसँगै न्युजिल्यान्डले समूह ‘डी’मा दुई खेलबाट ४ अंक पुर्‍याएको छ। पहिलो खेलमा न्युजिल्यान्डले अफगानिस्तानलाई ५ विकेटले हराएको थिय।

युएईको भने यो नै पहिलो खेल हो।न्युजिल्यान्डका विकेटकिपर ब्याटर सेफर्टले आक्रामक ब्याटिङ गर्दै ४२ बलमा अविजित ८९ रन बनाए।

उनले १२ चौका र ३ छक्का प्रहार गरे। अर्का ओपनर एलेनले पनि ५० बलमा अविजित ८४ रन जोडे। एलेनको इनिङ्समा ५ चौका र ५ छक्का समावेश थिए।