अस्ट्रेलिया, इङ्ल्यान्ड र भारतलाई कीर्तिपुरमा खेल्न आउन रोहितले दिए निम्तो

काठमाडौं। नेपाली राष्ट्रिय क्रिकेट टोलीका कप्तान रोहितकुमार पौडेलले विश्व क्रिकेटका शक्तिशाली राष्ट्रहरू अस्ट्रेलिया, इङ्ल्यान्ड र भारतलाई कीर्तिपुरस्थित त्रिवि क्रिकेट मैदानमा आएर खेल्न खुला निम्तो दिएका छन्।

उनका अनुसार ठूला राष्ट्रहरूको आगमनले नेपाली क्रिकेटलाई अन्तर्राष्ट्रिय स्तरमा नयाँ उचाइ दिनेछ।

मुम्बईस्थित वानखेडे स्टेडियममा मंगलबार प्रेस रुममा सञ्चारकर्मीहरूसँग कुरा गर्दै रोहितले भने,‘इङ्ल्यान्ड, अस्ट्रेलियाजस्ता ठूला टिम नेपाल आएर खेले भने त्यसको अर्थ धेरै ठूलो हुनेछ।’ उनले यस्तो अवसरले विश्व क्रिकेटको ध्यान नेपालतर्फ खिच्ने र घरेलु क्रिकेटको स्तर समेत उकासिने विश्वास व्यक्त गरे।

रोहितले पछिल्लो समय इङ्ल्यान्डविरुद्ध देखाएको प्रदर्शनले नेपाली क्रिकेटको साख बढाएको बताए। आईसीसी टी–२० विश्वपकपअन्तर्गत समूह ‘सी’को पहिलो खेलमा नेपाल दुईपल्टको विश्वविजेता इङ्ल्यान्डसँग ४ रनले पराजित भएको थियो।

‘दुई वर्षअघि दक्षिण अफ्रिकाविरुद्ध जितनजिक पुगेका थियौं। अहिले इङ्ल्यान्डविरुद्ध पनि त्यस्तै अवस्था आयो। यी खेलहरूले हामीलाई विश्व क्रिकेटमा चिनाएको छ,’ उनले भने।

रोहितले नेपाली क्रिकेटले माथिल्लो स्तरमा अपेक्षाअनुसार अन्तर्राष्ट्रिय अवसर नपाएको गुनासो पनि गरे। उनका अनुसार पछिल्लो विश्वकपयता वेस्ट इन्डिजविरुद्धको सिरिज मात्र टेस्ट राष्ट्रसँग खेलेको एक मात्र अवसर हो।

नेपालले विश्वकप छनोटअघि संयुक्त अरब इमिरेट्स (युएई)मा वेस्ट इन्डिजसँग तीन खेलको टी–२० आई सिरिज खेलेको थियो। नेपालले उक्त सिरिज २–१ ले हात पारेको थियो। सुरुआती दुई खेलमा १९ र ९० रनको जित हात पारेको नेपाल अन्तिम खेलमा १० विकेटले पराजित भएको थियो।

योसँगै नेपाल सिरिज क्लिन स्वीप गर्न चुकेको थियो। ‘हामी बढीभन्दा बढी अवसर चाहन्छौं। कम्तीमा प्रत्येक वर्ष केही सिरिज टेस्ट टिमविरुद्ध हुनुपर्छ,’ उनले जोड दिए।

ठूला टिमहरूसँग नियमित खेल भए नेपाली खेलाडीहरू व्यावसायिक लिगका लागि समेत तयार हुने रोहितको विश्वास छ। उनले प्रदर्शन र योग्यताका आधारमा अब केही नेपाली खेलाडी इन्डियन प्रिमियर लिग (आईपीएल) खेल्न सक्षम रहेको दाबी गरे।

इङ्ल्यान्डविरुद्धको खेलपछि टोलीको आत्मविश्वास बढेको उल्लेख गर्दै रोहितले इटालीविरुद्ध पनि त्यस्तै प्रदर्शन गर्ने विश्वास व्यक्त गरे। ‘इटाली राम्रो टिम हो। पछिल्लो समय उसले राम्रो क्रिकेट खेलेको छ,’ उनले भने।