बेन्जेमाले क्लब फेर्दा रिसाएका रोनाल्डो
काठमाडौं। मध्यपूर्वी फुटबल अहिले तीव्र तनाव र अनिश्चितताले चर्चामा रहेको छ। विवादास्पद ट्रान्सफरपछि अल–हिलालबाट डेब्यु गरेका करिम बेन्जेमाले पहिलो खेलमै उत्कृष्ट प्रदर्शन गरेका छन्।
गत बिहीबार अल–आखदुदविरुद्ध ६–० को विशाल जितमा उनले ह्याट्रिक गर्दै एक असिस्ट पनि गरे। यस जितसँगै २० खेलबाट ५० अंक जोडेको अल– हिलालले लिग तालिकाको शीर्षस्थान अझ बलियो बनाएको छ।
तर, सहरको अर्को छेउमा भने दृश्य बिल्कुल फरक छ। क्रिस्टियानो रोनाल्डो लगातार दोस्रो खेलमा अल–नासरको जर्सीमा मैदानमा उत्रिएनन्। शुक्रबार अल– इत्तिहादलाई २–० ले हराउँदै अल– नासर दोस्रो स्थानमा रहे पनि क्लब, लिग र रोनाल्डोबीचको द्वन्द्व तत्काल समाधान हुने संकेत देखिएको छैन।
विवादको सुरुआत बेन्जेमाको ट्रान्सफरबाट
यो विवाद केही दिनअघि सुरु भएको हो। करिम बेन्जेमाले अल– इत्तिहाद छोड्ने निर्णय गरे। २०२३ मा बालोन डि’ओर जितेपछि जेद्दाहको क्लबमा पुगेका बेन्जेमाले पछिल्लो पटक प्रस्ताव गरिएको नयाँ सम्झौतलाई ‘अपमानजनक’ भन्दै अस्वीकार गरेका थिए।
प्रस्तावमा तलब उल्लेख्य रूपमा घटाइने र आफ्ना १०० प्रतिशत इमेज राइट्स क्लबलाई सुम्पनुपर्ने शर्त थियो। यसपछि साउदी अरबको सबैभन्दा सफल क्लबमध्ये एक अल– हिलालले ३८ वर्षीय स्ट्राइकरलाई भित्र्याउन गोप्य वार्ता सुरु गर्यो।
अल– हिलाल, अल– नासर र अल– अहलीजस्तै पब्लिक इन्भेस्टमेन्ट फन्ड (पीआईएफ) को समर्थनमा चल्ने क्लब भएकाले यो कदमले रोनाल्डोलाई झन् असन्तुष्ट बनायो।
रोनाल्डोको असन्तुष्टि किन?
रियल मड्रिडमा नौ सिजन सँगै खेलेर १३ उपाधि जितेका बेन्जेमा र रोनाल्डोबीचको सम्बन्ध चर्चित छ। रोनाल्डोका लागि अल– हिलालले ठूलो स्टार ल्याउँदा अल– नासर भने ट्रान्सफर बजारमा लगभग निष्क्रिय रहनु विभेदपूर्ण व्यवहार जस्तै लाग्यो।
तर, अल– नासरले जुन ट्रान्सफर विन्डोमै करिब ८० मिलियन युरो खर्च गरिसकेको हुँदा पछिल्लो विन्डोमा उनीहरू निष्क्रिय बनेका हुन्।
रोनाल्डो पछिल्ला दुई खेलमा अल– रियाद र अल– इत्तिहादविरुद्ध मैदानमा देखिएनन्। यसपछि साउदी प्रो– लिगले सार्वजनिक रूपमा चेतावनी दिँदै कुनै पनि खेलाडी क्लबभन्दा माथि हुन नसक्ने स्पष्ट सन्देश दियो। लिगले सबै क्लब समान आर्थिक संरचनाभित्र स्वायत्त रूपमा सञ्चालन हुने पनि जनाएको छ।
तर, चेतावनीका बाबजुद रोनाल्डो डर्बी खेलमा पनि अनुपस्थित रहे। समर्थकहरूले स्ट्यान्डमा ‘७’ नम्बरको ब्यानर देखाएर उनको समर्थन जनाए। पत्रकार फाब्रिजियो रोमानोका अनुसार रोनाल्डोलाई कुनै शारीरिक समस्या थिएन, न त प्रशिक्षक जर्जे जेसुससँग व्यक्तिगत विवाद नै।
यसैबीच क्लबभित्र अर्को परिवर्तन पनि भयो। रोनाल्डोका नजिक मानिने स्पोर्टिङ डाइरेक्टर सिमाओ कौतिन्हो र जनरल म्यानेजर होजे सेमेदोले आफ्नो शक्ति गुमाए, जसलाई क्लबभित्र रोनाल्डोको प्रभाव घटाउने कदमका रूपमा हेरिएको छ।
भविष्य अनिश्चित
४१ वर्षीय रोनाल्डोको अल– नासरसँगको सम्झौता २०२७ को जुनसम्म छ। उनी वार्षिक २०० मिलियन डलरभन्दा बढी पारिश्रमिक पाउँछन् र करिब ५० मिलियन युरोको रिलिज क्लज रहेको छ। यति ठूलो सम्झौताका बाबजुद पनि उनको भविष्य अन्योलमा परेको छ।
साउदी प्रो– लिगको मुख्य रणनीति नै विश्वप्रसिद्ध खेलाडी भित्र्याउने भएकाले रोनाल्डोजस्तो स्टार गुमाउनु ठूलो धक्का हुनेछ। अब सबैको चासो आगामी मंगलबार तुर्कमेनिस्तानको अर्कादागविरुद्ध एएफसी च्याम्पियन्स लिगको खेलमा रोनाल्डो मैदानमा उत्रिन्छन् कि उत्रिँदैनन्? यसको उत्तर समयले नै दिनेछ।
