काठमाडौं । मनाङ मस्र्याङ्दी क्लब, यस बर्षको लिग च्याम्पियन । अनि घरेलु फुटलबको सर्वाधिक सफल क्लब । उसले कीर्तिमानी आठौँ पटक लिग जित्ने क्रममा घरेलु फुटबलमा जबर्जस्त प्रर्दशन गर्यो ।
लिगको दौरान क्लबले ब्यहोर्ने खेलाडी चोटको समस्याले मनाङलाई नसताएको होईन, तर मैदान भित्र त्यसको कुनै प्रभाव परेन । त्यसैले त दुई खेल अगावै मनाङ लिग च्याम्पियन भएको थियो । अन्तिम खेलमा फ्रेन्ड्संग हार्नु बाहेक लिगमा मनाङलाई कसैले चुनौती दिन सकेन ।
मनाङ धन्नै धन्नै अपराजित रहदै लिग च्याम्पियन बन्ने अभियानमा थियो । तर कमजोर मानिएको फ्रेन्ड्सले मनाङको जितलाई खल्लो बनाईदियो । लिगको दौरान मनाङले घरेलु फुटबलका बलिया क्लब थ्री स्टार र आर्मी जस्ता क्लबको चुनौती सहजै पाखा लगाएको थियो ।
नेपालको घरेलु फुटबलको बिशेषता भनेको लिग सकिने बित्तिकै मोफसलका गोल्डकपको लहर सुरु हुन्छ । नकआउटका आधारमा सञ्चालन गरिने प्रतियोगिताको पुरस्कार समेत राम्रै हुन्छ । सबै आयोजकको रोजाईमा राष्ट्रिय टिमका खेलाडीले भरिएका क्लबनै पर्छन् । त्यसमा मनाङ र थ्री स्टार छुट्ने कुरै भएन ।
लिगमा गरेको प्रर्दशनका आधारमा मनाङले मोफसलका प्रतियोगिताका राम्रो नतिजा निकाल्ने अपेक्षा गरिएको थियो । तर परिणाम ठिक विपरित छ । लिग सकिए लगत्तै मोफसलका प्रतियोगितामा खेल्न निस्किएको मनाङको अवस्था निकै नाजुक छ । सातौँ गोल्डकपसम्म आईपुग्दा मनाङ उपाधिबाट मात्र बिमुख छैन, मात्र एक प्रतियोगिताको फाईनल पुगेको छ ।
लिग लगत्तै खप्तड गोल्डकप खेलेको मनाङ पहिलो खेलमै विभागीय नेपाल पुलिससँग पराजित हुँदै प्रतियोगिताबाट बाहिरियो ।
लगत्तै उसले मदन भण्डारी स्मृति ईटहरी गोल्डकप खेल्यो । फाईनलसम्म समेत पुग्यो तर उपाधि भिडन्तमा आर्मीसंग पराजित हुन पुग्यो ।
ईटहरीबाट पोखरा हिडेको मनाङ मनकामना केबलकार पोखरा कपमा क्यामरुनको दाउफिन्ससंग पराजित हुदै सेमिफाईनलबाट बाहिरिएको थियो । गत बिहीबार बुटवलमा सुरु भएको तिलोत्तमा गोल्डकपको पहिलो खेलमै च्यासल युथसँग पराजित हुँदै मनाङ क्वार्टरफाईनलबाटै बाहिरियो ।
लिग च्याम्पियनको रुपमा एएफसी कपको छनोट खेल्ने तयारी गरेको मनाङलाई मोफसलको प्रर्दशनले समस्यामा पारिदिएको छ । मनाङको नतिजाबाट प्रशिक्षक सुमन श्रेष्ठ समेत अचम्मित छन् ।
‘सबै खेलाडी राम्रा छन् । लिग खेलेका खेलाडीनै खेलिरहेका छन् । तर के मिलेको छैन के, म आफै हैरानीमा छु ।’ उनले भने ।
‘अभ्यासमा भनेको जस्तै हुन्छ, जव मैदान उत्रन्छौ रिजल्टनै आउँदैन । भनेको अनुसार प्रर्दशनमा मेल खाएको देखिदैन ।’ सुमन थप्छन् ।
मनाङलाई खेलाडीको चोटले समेत पिरोलेको छ । लिग च्याम्पियन बनाउन महत्वपुर्ण भुमिका खेलेका अन्जन विष्ट, विशाल राई र विदेशी खेलाडी एडेलाजा सोमिडे घाईते छन् ।तीनै खेलाडी मोफसलमा खासै खेलेको छैनन् । अर्का स्ट्राईकर डोना थापाले भर्खरै खुट्टाको शल्यक्रिया गरेर आराम गरिरहेका छन् ।
मनाङ आहा रारा गोल्डकप खेल्न यतिबेला पोखरामा छ । लगत्तै मनाङ एएफसी कपको तयारीमा जुट्नेछ । मनाङ क्लबको नेतृत्वमा भर्खरै मात्र नयाँ कार्यसमिति आएको छ । प्रत्येक दुई बर्षमा क्लबको नेतृत्व फेरिन्छ ।
कतै क्लबको नेतृत्व परिवर्तनको प्रभाव क्लबमा परेको त होईन ? ‘समितिको चयनले खेलाडीको प्रर्दशनमा फरक पार्ने त हुदैन । तर लामो समय एउटै नेतृत्व नहुदाँ केही फरक त पर्छ नै । एउटा आएर काम गर्न खोजेको हुन्छ । नेतृत्वमा परिवर्तन हुदाँ काम हुन पाउदैन ।’ प्रशिक्षक सुमन भन्छन् ।
मोफसलको प्रतियोगितामा मनाङको खस्कदो प्रर्दशनले क्लबका पदाधिकारीलाई समेत बिलखबन्दमा पारिदिएको छ । मनाङका नवनिर्वाचित कार्यसमितिका उपाध्यक्ष मुखिया लामा समेत क्लबको प्रर्दशनलाई लिएर चिन्ता व्यक्त गर्छन् । ‘मैले बुझ्न सकिरहेको छैन । किन रिजल्ट आएन भनेर हामी समेत चिन्तित छौ । नाम चलेकै खेलाडी छन् । तर रिजल्ट आएको छैन ।’ उनी भन्छन् ।
‘प्रशिक्षकसंग कुरा गरिरहेका छौ । मेहनत गरेको कुरानै गर्छन् । तर नतिजा आएको छैन । हामीले हाम्रोतर्फबाट गरेका छौ । खेलाउने कोचले हो । तर हामीलाई चोटको समेत समस्या छ ।’ मुखिया थप्छन् ।
घरेलु फुटबलको खर्चिलो र सफल क्लब मनाङको एउटै उद्वेश्य हुन्छ, मात्र उपाधि । तर राम्रा खेलाडीले भरिएको मनाङ मोफसलमा खाली हात छ ।
लिग विजेताको हैसियतमा मनाङले एएफसी कप खेल्दैछ । अब घरेलु फुटबलको महारथी मनाङले एसियाली स्तरमा समेत आफ्नो चुनौती पेश गर्नेछ । चिन्ताको बिषय भनेको मोफसलका प्रतियोगितामा ओरालो लागेको मनाङको प्रर्दशन एएफसी कपमा कस्तो हुन्छ भन्ने हो ?
प्रत्येक देशका लिग विजेता टोलीले खेल्ने एएफसी कपमा मनाङ मात्र जोडिने छैन । नेपाली क्लब फुटबलको स्तर समेत देखाउनुपर्ने उसमाथि चुनौती छ ।
-1756819320.jpg)
