काठमाडौं । नेपालको लिग च्याम्पियन सिग्नेचर मनाङ मर्स्याङ्दी क्लबले एएफसी कप फुटबल अन्तर्गत समूह चरणको पहिलो खेलमा बंगलादेशी क्लब ढाका अबहानी लिमिटेडसंग प्रतिस्पर्धा गर्ने भएको छ ।
एसियन फुटबल महासंघ एएफसीले सार्वजनिक गरेको खेल तालिका अनुसार मनाङले पहिलो खेलमा अबहानी लिमिटेडको सामना गर्ने भएको हो ।
समूह 'ई' मा रहेको मनाङले पहिलो खेलको रुपमा अप्रिल ३ मा अबहानी लिमिटेडको सामना गर्ने छ । मनाङको होम खेल अन्तर्गत रहेको उक्त खेल एन्फा कम्प्लेक्स सातदोबाटोमा हुनेछ । मनाङले अबहानीसंग अवे खेल भने ढाकास्थित बंगबन्धु स्टेडियममा आगामी जुन १९ मा खेल्नेछ ।
यस्तै मनाङले प्ले अफबाट आउने टोलीसंगको अवे खेल अप्रिल १७ मा खेल्नेछ । जसमा भारत, श्रीलंका र भुटान मध्येको एक टोलीले खेल्नेछ । प्ले अफबाट आउने टोलीसंग मनाङले होम खेल आगामी जुन २६ मा एन्फा कम्प्लेक्समा खेल्नेछ ।
त्यस्तै मनाङले भारतको च्याम्पियन मिनेर्भा पन्जाबसंगको अवे खेल भुवनेश्वरमा आगामी मे १ मा खेल्नेछ । मनाङले पन्जाबसंगको होम खेल मे १५ मा एन्फा कम्प्लेक्समा खेल्नेछ ।
होम एण्ड अवेको आधारमा हुने प्रतियोगिताको विजेता टोलीले इन्टर जोन प्ले अफको सेमिफाइनलमा स्थान बनाउने छन् ।प्ले अफमा समूह 'इ' को विजेतासहित समूह 'डी', 'आइ' र एसिन क्षेत्रको विजेताले खेल्नेछ ।
खेल तालिका :
