काठमाडौं। कोल पाल्मरको बाँया खुट्टा चम्दा चेल्सीले नसोचेको उपाधि जित्यो।
क्लब विश्वकपको बिस्तारित संस्करणको फाइनलमा पेरिस सेन्ट–जर्मेन (पीएसजी) जस्तै तगडा क्लबलाई ३–० ले हराउँदै लण्डन क्लबले सन् २०२१ पछि दोस्रो पटक विश्वको सर्वोच्च क्लब उपाधि जितेको हो।
तर, यो उपाधि मात्र थिएन। यो संदेहको छायामा रहेको टोलीको आत्मघोषित पुनरागमन रह्यो।
अमेरिकाको मेटलाइफ स्टेडियममा खेलिएको फाइनलले दुई पृथक क्लब दर्शनबीचको टकराव देखायो।
पीएसजीसँग केही महिना अघि च्याम्पियन्स लिग जितेको सुपरस्टार थिए। तर, चेल्सीले योजनाको सुसज्ज र सामूहिक लय देखायो।
पाल्मरले २२औं र ३०औं मिनेटमा लगातार गोल गर्दै खेलको गति नै बदले। उनी स्कोरर मात्रै होइनन्, सर्जक पनि बने। ४३औं मिनेटमा उनले दिएको थ्रूपासमा जोआओ पेड्रोले डोनारुम्मालाई चिप गर्दै गोल गरे।
एकातिर ऊर्जा, योजना र स्पेसको सदुपयोग, अर्कोतिर फ्रेन्च क्लबको असन्तुलित रक्षा र निराश अनुहार। पीएसजीका प्रशिक्षक लुइस एनरिकेले खेलपछि स्वीकारे,‘हामी आज उत्कृष्ट थिएनौं।’
यो पीएसजीको २०२३ को अक्टोबरपछि सबैभन्दा खराब हार हो, जुन क्लबको ‘क्वाड्रपल’ सपनाका लागि करेला कम नीम जस्तो तितो बन्यो।
खेलको अन्त्यतिर तनाव चुलियो। ८४औं मिनेटमा जोआओ नेभेसले मार्क कुकुरेलाको कपाल तान्दा रातो कार्ड पाए।
त्यसपछि पेड्रोलाई धकेल्ने क्रममा लुइस एनरिके स्वयं मैदानको सिमा रेखा नाघे। ट्रफीको रङ निलो थियो, तर पीएसजीको मन रङहीन भयो।
फाइनलले पाल्मरलाई चेल्सीका स्टार होइन, सम्भवतः आधुनिक चेल्सीको प्रतीक पनि बनायो। म्यानचेस्टर सिटीले केही वर्षअघि जुन सम्भावनालाई देखेर उनलाई स्ट्यामफोर्ड ब्रिज छाड्यो, त्यसले अब फल दिन थालेको छ।
उनले सिजनमा १८ गोल गरिसकेका छन् र क्लबको पुनर्निर्माण कथा उनैसँग जोडिएको छ।
८१ हजारभन्दा बढी दर्शकबीच अमेरिकी राजनीतिकको रंग पनि मिसियो। राष्ट्रपति डोनाल्ड ट्रम्प ट्रफी समारोहमा फिफा अध्यक्ष जियानी इन्फान्टिनोसँग देखिए, हुटिङको बीचमा। तर, त्यसबेला मुख्य दृश्य चेल्सीका कप्तान रिस जेम्सले ट्रफी उठाउँदै गरेका थिए।
यस जितले चेल्सीको लिग तयारीमा नयाँ ऊर्जा थपेको छ। प्रिमियर लिगमा लिभरपुल, म्यानचेस्टर सिटी र आर्सनलसँग टक्कर दिने तयारीमा रहेको टोलीले अब आफैंलाई पुनः ‘क्लब फुटबलको राजवंश’ घोषणा गर्न थालेको छ।
तीन वर्षअघि पराजयको उपमा बनिरहेको चेल्सी अहिले फुटबल संसारको शिखरमा छ। नयाँ टोली, नयाँ योजना छ।
यसले देखायो, फुटबलमा उपाधि लगानीले मात्रै होइन, दृश्य र दृष्टिकोण पनि जित्ने रहेछ।
-1752456636.jpeg)
