काठमाडौं। गोलकिपर रुपना चक्माले उत्कृष्ट प्रदर्शन गरेसँगै बंगलादेशले साफ च्याम्पियनसिप २०२४ मा भारतलाई पराजित गरेको छ। तोहुरा खातुनको दुई गोलसँगै बंगलादेशले भारतमाथि ३-१ को जित दर्ता गरेको हो।
पाँचपल्टको च्याम्पियन भारतको साफमा बंगलादेशसँग यो ब्याक टु ब्याक पराजय हो। यसअघि बंगलादेशले त्रिपुरेश्वरस्थित दशरथ रंगशालामै भएको पछिल्लो संस्करणको समूहचरणको अन्तिम खेलमा ३-० को जित हात पारेको थियो। साफमा भारतको समग्रमा भने यो तेस्रो हार हो। सोही संस्करणमा रश्मिकुमार घिसिङको निर्णायक गोलमा भारत १-० ले पराजित हुँदै सेमिफाइनलबाट बाहिरिएको थियो।
भारतलाई पराजित गरेसँगै बंगलादेश समूह ए को विजेता बन्दै अन्तिम चारमा प्रवेश गरेको छ। बंगलादेशले दुई खेलबाट चार अंक पुर्यायो। भारत समान खेलबाट तीन अंकसहित अन्तिम चारमा प्रवेश गर्दा पाकिस्तान भने बाहिरिएको छ। पाकिस्तानले बंगलादेशलाई १-१ गोलको बराबरीमा रोकेको थियो। तर, भारतसँग भने ५-२ ले पराजित हुनपुग्दा समूहचरणबाट स्वदेश फर्किन बाध्य भयो। बंगलादेशको पहिलो जितमा तोहुराबाहेक अफिदा खाँडकरले एक गोल थपिन्। भारतका लागि गोल मेसिन बालदेवीले गरेको गोल सान्त्वना रह्यो।
भारतले सुरुआती समयदेखि नै बंगलादेशलाई दबाबमा राख्ने प्रयास गरेको थियो। १०औं मिनेटमा मनिषाले सुनौलो अवसर खेर फ्यालिन्। आफ्नै खेलाडीले दिएको ब्याक पासलाई अगाडि बढेर गोलकिपर रुपनाले रिलिज गर्न ढिला गरेकी थिइन्। उक्त बल मनिषासँग डिफ्लेक्ट भएर पोलनजिकबाट बाहिरिँदा बंगलादेशको खतरा टरेको थियो।
१९औं मिनेटमा बंगलादेशले सुरुआती अग्रता लियो। कप्तान सविना खातुनको कर्नरबाट आएको बललाई भारतीय गोलकिपर पानथोई चनुले पञ्च गर्दै बचाउने प्रयास गरेकी थिइन्। तर, राम्रोसँग क्लियर हुन नसकेको बललाई अफिदाले सिक्स यार्डनजिकबाट गरेको प्रहार टप कर्नरबाट गोलमा परिणत भयो। २६औं मिनेटमा ऋतु चक्माले एकल प्रयासमार्फत गरेको प्रहार बारमा लागेर फर्किँदा बंगलादेशले अग्रता दोब्बर बनाउने मौका गुमायो।
तर, त्यसको चार मिनेटमपछि नै बंगलादेशले अग्रता दोब्बर पार्न सफल भयो। लामो पासमार्फत आएको बललाई गोल लाइननजिबबाट तोहुराले जाली चुमाइन्। ३५औं मिनेटमा भारतकी बालदेवी वान भर्सेस वानमा चुक्न पुगिन्। नियमित कप्तान अशलता देवीको स्थानमा उनी कप्तानी आर्म ब्यान्ड बाँधेर मैदान उत्रिएकी थिइन्।
४२औं मिनेटमा तोहुराले व्यक्तिगत दोस्रो गोल गरिन्। सामसुनार जुनियरले मिलाइदिएको क्रसलाई तोहुराले पेनाल्टी बक्सनजिकबाट प्रहार गरेको बल सिधै जाली चुम्यो। लगत्तै बालादेवीले भारतका लागि पहिलो गोल फर्काइन्। डालिमा छब्बरको क्रसलाई गोलकिपर रुपनाले पञ्च गर्दै बचाउने प्रयास गरेकी थिइन्। राम्ररी क्लियर हुन नसकेको बललाई बालादेवीले हेडिङमार्फत गोल गरिन्।
विराटनगरमा सन् २०१९ मा भएको साफ महिला च्याम्पियनसिपमा ‘मोस्ट भ्यालुएबल प्लेयर’ घोषित भएकी डिफेन्डर छिब्बरले यही खेलमार्फत पुनरागमन गरेकी थिइन्। त्यसपश्चात व्यवसायिक लिग खेल्न क्यानडा गएकी उनले सन् २०२२ को पछिल्लो संस्करण गुमाएकी थिइन्।
६३औं मिनेटमा ज्योती चौहानको प्रहारमा पुन: बंगलादेशकी गोलकिपर रुपना बाधक बनिन्। रिम्पा हल्दरले मिलाइदिएको बललाई ज्योतीले पेनाल्टी बक्सभित्रबाट प्रहार गरेपनि उनले बचाइदिइन्। ८२औं मिनेटमा सपना रानीले अग्रता ४-१ मा पुर्याउने अवसर खेर फ्यालिन। करिब ३५ यार्डबाट उनले टप कर्नरमा प्रहार गरेको बललाई चनुले मुस्किलले बचाइन्।
-1747652309.jpeg)
