काठमाडौं। अमेकिामा क्रिकेटलाई परिचित बनाउन स्थापित गर्नु पनि केही विशेष हुनैपर्छ। नाटकीय परिस्थिति, भरपूर मनोरन्जन, उच्चस्तरको खेल कौशल र केही उतारचढाव चाहिन्छ नै। ठीक यस्तै रह्यो ट्वान्टी–२० विश्वकप २०२४ को सहआयोजक अमेरिकाले पूर्वच्याम्पियन पाकिस्तानलाई बिहीबार टेक्ससमा स्तब्ध पारेको खेल।
अमेरिकाले पहिलोपटक ट्वान्टी–२० इन्टरनेसनल खेलेको पाँच वर्षमात्रै हुँदैछ। उसले विश्वकप खेलेको पनि यो नै पहिलोपटक हो। र, अमेरिकाले विश्व क्रिकेटको शक्तिशाली टिम पाकिस्तानविरुद्ध प्रतिस्पर्धा गरेको पनि पहिलोपटक नै हो।
विश्व क्रिकेटको वरीयातमा अमेरिका १८ औं स्थानमा छ, जुन नेपाल र युएई (युनाइटेड अरब इमिरेट्स) भन्दा पनि पछाडि हो। पाकिस्तान सन् २०२२ मा भएको ट्वान्टी–२० विश्वकपको फाइनलमा पुगेको थियो। उसले सन् २००९ को विश्वकपको त उपाधि नै जितेको थियो। वास्तवमा यस्तो (पाकिस्तानविरुद्ध अमेरिकाको जित) नहुनुपर्ने थियो तर यो अवसर दिने भूमि हो। यो टेक्सस हो, जहाँ सबथोक ठूलो हुन्छ।
‘पाकिस्तानलाई पराजित गर्नु ठूलो उपलब्धि हो,’ अमेरिकी कप्तान मोनांक पाटेलले भने, ‘यो टिम अमेरिकाको लागि ठूलो दिन हो र अमेरिकी क्रिकेट समुदायको लागि पनि।’
न्यूयोर्कमा प्रतियोगिताका अन्य खेलमा ‘स्लो पिच’मा बनेको थोरै रन र खेललाई निरस बनाइरहेको चर्चा भइरहेको बेला टेक्ससमा सनसनीपूर्ण नतिजा आएको हो। यसले अमेरिकामा क्रिकेट स्थापित हुनसक्ने र उत्कृष्ट बन्नसक्ने देखाएको छ। र, यो सबै एनएफएलको सबैभन्दा मूल्यवान् टिम डालास काउब्वाइजको आँगनमा भएको हो।
क्यानडाविरुद्ध आरोन जोन्सको १० छक्कासँगै अमेरिकाले विश्वकपमा उत्कृष्ट सुरुआत गरेको थियो। त्यसपछि समग्र टिमको उत्कृष्ट प्रदर्शनमा पाकिस्तानलाई पन्छाएको हो। यसले अमेरिकामा राज्यले हेर्ने खेलप्रतिको नजरलाई परिवर्तन गर्नसक्छ। रंगीन दुनियाँको क्रिकेटको लागि टि–२० फ्रेन्चाइज लिगको नयाँ भूमि पनि बन्दैछ अमेरिका, जहाँ मेजर लिग क्रिकेट हुदैछ। क्रिकेटले लस एन्जलसमा २०२८ मा हुने ओलम्पिक गेम्समा पुनरागमन गर्दैछ। क्रिकेट ओलम्पिकमा १२८ वर्षपछि फर्किन लागेको हो।
‘विश्वकपमा पाकिस्तानविरुद्धको जितले हाम्रो लागि धेरै ढोका खोल्नेछ,’ कप्तान मोनांकले भने, ‘विश्वकपको आयोजना र टिमको प्रदर्शनले अमेरिकामा क्रिकेटको प्रगतिमा सहयोग गर्नेछ।’
पकिस्तान आईसीसी (इन्टरनेसनल क्रिकेट काउन्सिल) को पूर्ण सदस्य १२ देशमध्येको एक हो भने अमेरिका एसोसिएट सदस्यमात्रै हो। एसोसिएट भनेको अरु ९३ सदस्य देशजस्तै हो, जसलाई क्रिकेटको सर्बोच्च संस्थाले मान्यता दिएपनि टेस्ट खेलमा प्रतिस्पर्धा गर्न पाउँदैनन्।
पाकिस्तानविरुद्ध सुपरओभरमा हात पारेको नतिजापछि मनाएको खुशियालीले अमेरिकी क्रिकेट टिमको भावना र प्रभावलाई प्रष्टै देखाउँछ। ४० ओभरको खेलमा कुनैपनि परिस्थितिमा अमेरिकालाई पाहुना टिमभन्दा कमजोर देखिएको थिएन। ह्यारिस रउफको अन्तिम बलमा नीतिश कुमारले चौका प्रहार गर्नुमा कुनै आश्चार्य थिएन। सुपरओभरमा सौरभ नेत्रभल्करले चौका बेहोरे, वाइड पनि फाले तर खेल जिताइदिए।
बाबर आजम कप्तानीको टिमको प्रदर्शन लज्जास्पद रह्यो। अघिल्लो फाइनलमा इंग्ल्यान्डविरुद्ध हारेको पाकिस्तानलाई अझै न्यूयोर्कमा भारतविरुद्ध हुने खेलबाट प्रतियोगितामा फर्किने अवसर छ। अमेरिका भने लगातार दुई जितले समूहको शीर्षस्थानमा पुगेको छ। यसले उसलाई सुपर एटको यात्रानजिक पनि बनाएको छ।
वास्तवमै पाकिस्तानमाथि अमेरिकाको जितले एक शताब्दीअघिको अमेरिकी क्रिकेटलाई सम्झाइदिएको छ, चर्चामा ल्याइदिएको छ। बलर जोन बार्तोन प्रेरित फिलाडेल्फियाले सन् १९०४ र १९०८ मा इंग्ल्यान्ड भ्रमण गरेको थियो। जसले ‘फस्ट क्लास’ तहमै लंकासायर, केन्ट र सरेलाई पराजित गरेको थियो।
आर्थर मेलीले सन् १९३२ मा निजी टुर आयोजना गरेको थियो, जहाँ डन ब्राडम्यानसहितको अस्ट्रेलिया ११ लाई अमेरिकी भूमिमा बराबरीमा रोकेको थियो। न्यूयोर्कमा ब्राडम्यानलाई शून्यमै आउट गरेको खेलको चर्चा अहिलेसम्मै हुन्छ।
टोनी ग्रेगको कप्तानीमा ग्यारी सोबर्स, एलन नट, ग्रेग च्यापेलसम्मिलित वल्र्ड अल स्टार्स ११ लाई ब्रोंक्समा आठ हजार दर्शकसामु अमेरिकाले हराएको थियो। अर्को टेस्ट खेल्ने देश बंगलादेशविरुद्ध यो विश्वकपको तयारीमा भएको सिरिजको उपाधि नै अमेरिकाले जितेको थियो।
ती इतिहासभन्दा पनि यो विश्वकपमा पाकिस्तानविरुद्ध हात पारेको सनसनी जित र लगातारको उत्कृष्ट प्रदर्शनले अमेरिकामा क्रिकेटलाई स्थापित गर्ने संकेत दिएको छ। एउटा एसोसिएट टिमको लागि विश्वकपमा योभन्दा राम्रो सुरुआत अरु हुन सक्दैन। अमेरिकामा मृत्यु भएको मानिएको क्रिकेटलाई मेजर लिग क्रिकेट र यो विश्वकपले पुनरोदय गर्ने विश्वास छ।
–एजेन्सीहरू
