काठमाडौं। साफ यु–१७ महिला च्याम्पियनसिपको दोस्रो लेगमा नेपाल फेरि पनि भारतसँग ठूलो अन्तरले पराजित भएको छ।
खेल सुरु भएको पहिलो १५ मिनेटमै दुई गोल खाएको नेपाली टोली त्यसपछि दबाबमा परेको थियो। अन्ततः नेपालले ५–० को हार बेहोर्नुपर्यो।
मुख्य प्रशिक्षक चेतनारायण श्रेष्ठले खेलपछि भने,‘हामीले प्लान–ए, प्लान–बी र प्लान–सी बनाएर खेलमा उत्रेका थियौं। तर, प्लान–बी नै सुरक्षित लाग्यो। यसमा खेल्दै कम्तीमा एक अंक ल्याउने रणनीति थियो। सुरुको गल्ती र छिट्टै गोल खाएपछि टोलीको मोरल डाउन भयो र त्यसको असर खेलभरि देखियो।’
जारी प्रतियोगितामा भारतले अपराजित रहँदै उपाधि उचाल्दा नेपालले चौथो हार बेहोरेको हो। उनका अनुसार स्वास्थ्यमा समस्याले पनि टोलीलाई असर गरेको छ।
‘यो प्रतियोगिताका लागि पहिलो पटक यी खेलाडीलाई ल्याएको हुँ। तर, धेरै खेलाडी स्वास्थ्य समस्याले पिरोलिए। बदल्ने खेलाडी पनि त्यस्तै खालका भएकाले विकल्प सीमित रह्यो,’ उनले बताए।
भारतविरुद्ध पराजयपछि अब नेपाल दोस्रो लेगको तेस्रो खेलमा भुटानसँग भिड्नेछ। घरेलु मैदान र समर्थकबीच उत्रने भुटानले बंगलादेशसँग १–१ को बराबरी खेलेर राम्रो प्रदर्शन गरिसकेको छ।
त्यसैले श्रेष्ठ अन्तिम खेल कठिन हुने स्वीकार्छन्। हुन पनि नेपालले पहिलो लेगमा यो टोलीविरुद्ध नेपालले २–१ को पुनरागमन जित निकालेको थियो।
प्रशिक्षक श्रेष्ठले भने, ‘भुटान अहिले धेरै माथि आएको टोली हो। उनीहरुसँगको अन्तिम खेल कठिन हुनेछ। अस्ति खेलेको स्तरले मात्र पुग्दैन, अझ बढी मिहिनेत गरेर अवसर खेर नफ्याँकि खेल्न सके जित्न सक्छौं।’
नेपालले यसअघि भुटानलाई २–१ ले हराएको स्मरण गर्दै प्रशिक्षकले थपे, ‘त्यो जितले हाम्रा नानीहरूको मोरल केही बढाएको छ। तर, फेरि गल्ती दोहोर्याउने हो भने सजिलो हुने छैन। मौका पाएको बेलामा सजग हुनुपर्छ।’
