काठमाडौं। फ्रेन्ड्स क्लबले अखिल नेपाल फुटबल संघ (एन्फा) का प्रमुख कार्यकारी अधिकृत (सिइओ)को क्लब संकटामाथि कारबाही गर्न माग गरेको छ।
एन्फा यु–१६ युथ लिगको खेल चलिरहेको अवस्थामा संकटाका खेलाडी र अफिसियल खेल पूरा नहुँदै आफ्नो सामाना उठाए र खेलमैदान छाडेर हिँडेका थिए। उक्त समयमा फ्रेन्ड्सले सयल परियारको गोलमार्फत १–० को अग्रता लिइसकेको थियो।
फ्रेन्ड्सले भनेको छ,‘एकतर्फी निर्णय लिइ हामीविरुद्ध भएको अन्यायको मध्यनजर गरि उक्त खेल सञ्चालन गर्नुहुने म्याच कमिसनर, रेफ्री एसेसरका साथै रेफ्रीहरूलाई उक्त घटनाको छानबिन गरिदिनु भइ कारबाही गर्दिनुहुन अनुरोध गर्दछु।’
फ्रेन्ड्सले सुरुआती अग्रता लिएपछि संकटाले रेफ्रीहरूको निर्णय अस्वीकार गरि मैदान तथा प्लेयर बक्स छोडी गएको थियो। ३० मिनेटमा दिइने चेतावनी ह्विसल दुईपल्ट बजाउँदा पनि संकटाका अफिसियल खेलाडी मैदान उत्रिन मानेका थिएनन्। उक्त चेतावनी ह्विसर बजेपछि विपक्षीको खेल गतिविधि हेरेर म्याच कमिसनरले खेल टुंगिएको घोषणा गर्नुपर्ने अन्तर्राष्ट्रिय नियम छ।
तर, उक्त कुरालाई बेवास्ता गरेर एकपक्षीय तरिकाबाट फेरि खेल सञ्चालन गरिएकोप्रति फ्रेन्ड्सका टिम म्यानेजर शंकर खड्काले असन्तृष्टी जनाएका छन्। पछि मैदान फर्किँदा संकटाले २–१ को पुनरागमन जित निकालेको थियो।
संकटाको असन्तुष्टि पुरानै हो। मच्छिन्द्र फुटबल क्लबविरुद्धको खेलमा निर्णायक गोल अफसाइड भएको भन्दै संकटाले आपत्ति जनाएको थियो। बराबरीतर्फ उन्मुख खेलमा गणेश विकले गरेको निर्णायक गोल गरेका हुन्। सो खेलमा फस्ट असिस्टेन रेफ्री गणेश तामाङ थिए।
उनको लाइनबाटै सो गोल भएको थियो। उक्त खेल मच्छिन्द्रले २–१ ले जितेको थियो। तर, शुक्रबार फेरि उनै गणेशलाई फस्ट असिस्टेन रेफ्रीको भूमिका दिइयो। लगत्तै संकटाको क्याम्प भड्कियो। खेल सुरु भएको छैटौं मिनेटमै अफिसियलले सबै खेलाडीलाई मैदानबाट बाहिर बोलाए।
यहीबीच फ्रेन्ड्सका सयलले खाली पोस्टमा गोल गरेका थिए। गोलको खुसी मनाउन नपाउँदै प्रतिस्पर्धी टोली नै सामाना बोकेर मैदान छाड्दा मैदानको अवस्था तनावपूर्ण देखियो।
संकटा क्लबका अध्यक्ष इन्द्रमान एन्फाका सिइओ पनि हुन्। यसै कारण मैदानमा देखिएको विरोधाभास अझै चर्को देखिन्छ। एन्फा लिग चलाउने प्रमुख अधिकारीकै क्लबले नै खेल छाड्ने कार्यको फ्रेन्ड्सले प्रश्न उठाएको हो।
