काठमाडौं। नवनियुक्त मुख्य प्रशिक्षक जेन्नारो गट्टुसोले शुक्रबार घोषणा गरेको इटालीको टोलीमा लिभरपुलका १८ वर्षीय डिफेन्डर जियोभानी लिओनीलाई पहिलो पटक अवसर दिइएको छ।
गट्टुसोले इन्टर मिलानका फरवार्ड फ्रान्चेस्को पिओ एस्पोसितो र बोलोग्नाका मिडफिल्डर जियोभानी फाब्बियनलाई पनि पहिलो पटक राष्ट्रिय टोलीमा बोलाएका छन्।
गत जुनमा ल्युसियानो स्पालेत्तिलाई बरखास्ती गरेर नियुक्त भएका गट्टुसोले यो पहिलो पटक टोली घोषणा गरेका हुन्। लगातार तेस्रो पटक विश्वकपमा छनोट हुन नसक्ने जोखिम खेपिरहेको इटालीका लागि अब त्रुटिको ठाउँ छैन।
टोलीले आगामी शुक्रबार बर्गामोमा एस्टोनियाविरुद्ध र त्यसको तीन दिनपछि हंगेरीमा इजरायलविरुद्ध छनोट खेल खेल्नेछ। इटालीले दुई खेलबाट तीन अंक जोडेको छ।
चार खेल खेलेको नर्वे १२ अंकसहित समूह ‘आइ’ को शीर्ष स्थानमा छ भने तीन खेलबाट ६ अंक जोडेको इजरायल दोस्रो स्थानमा छ। लिओनी यसै महिना पार्माबाट लिभरपुल पुगेका हुन् तर अहिलेसम्म प्रिमियर लिग च्याम्पियनका लागि खेलेका छैनन्।
यसैबीच, एटालान्टाका फरवार्ड जियानलुका स्कामाक्का चोटपछि टोलीमा फर्किएका छन्। रोमा डिफेन्डर जियानलुका मन्चिनी पनि स्पालेत्तिले बाहिर राखेपछि पहिलो पटक फर्किएका छन्।
साउदी अरबमा स्थानान्तरण भए पनि फरवार्ड माटेओ रेटेगुईलाई टोलीमा समावेश गरिएको छ। यसैगरी, काँधको समस्या खेपिरहेका न्यूक्यासलका मिडफिल्डर सान्द्रो तोनाली पनि सूचीमा छन्।
