काठमाडौं। अमेरिकाले ट्वान्टी–२० विश्वकप २०२४ मा पाकिस्तानलाई पराजित गर्दै बिहीबार क्रिकेट इतिहासकै एक सनसनीपूर्ण नतिजा निकालेको छ। उसले घरेलु मैदान डालासमा पाकिस्तानमाथि सुपर ओभरमा जित हात पारेको हो।
नीतिशकुमारले अमेरिकाको इनिङ्सको अन्तिम बलमा चौका प्रहार गर्दै १ सय ५९ रनको स्कोर बराबरी गर्नुअघि पाकिस्तान लज्जास्पद नतिजा टार्ने अवस्थामा देखिएको थियो। खेलमा कुनै पनि बेला लयमा नदेखिएको पाकिस्तानले सुपर ओभरमा पनि राम्रो गर्न सकेन।
मोहम्मद आमिरले तीनपल्ट वाइड बल फाले, जसमा सहआयोजक टिमले दुई अतिरिक्त रन बटुल्न भ्याएको थियो। सुपर ओभरमा अमेरिकाले एक विकेट गुमाएर १८ रन बनायो। पाकिस्तानले तीव्र गतिका बलर सौरभ नेत्रभल्करको ओभरमा जितको लागि १९ रन बनाउने लक्ष्य पाएको थियो।
इफ्तिखर अहमदले दोस्रो बलमै चौका प्रहार गरेपछि अन्तिम चार बलमा पाकिस्तानलाई १४ रन चाहिएको थियो। त्यसपछि वाइड बल फालेलगत्तै नेत्रभल्करले इफ्तिखरलाई क्याचाउट गराउँदै पाकिस्तानमाथि दबाब बढाएका थिए। पाकिस्तानलाई जितको निम्ति अन्तिम बलमा ७ रन आवश्यक रहेको स्थितिमा शबाब खानले १ रन जोडेपछि अमेरिकी खेलाडी र समर्थकले भव्य खुसीयाली मनाए।
यो सनसनीपूर्ण नतिजाले विश्वकपमा ठूलै उतारचढाव ल्याएको छ। पाकिस्तानले २६–६ को खराब स्थितिमा सुधार गर्दै १५९–७ को स्कोर बनाएको थियो। एक समय अमेरिका सहज जितनजिक पुगेको थियो, जति बेला उसलाई नौ विकेट हातमा रहेको अवस्थामा सात ओभरमा ५६ रन चाहिएको थियो। तर, पाकिस्तानले खेल सुपर ओभरसम्मै धकेल्यो। उसले फेरि निराशा रोक्ने अवसर पायो। तर, यो विश्वकपमा ठूला टिमलाई स्तब्ध पार्ने पहिलो टिमको रूपमा अमेरिकालाई रोक्न सकेन।
अमेरिकाको जितले सुपर एटमा पुग्ने सम्भावना खुला बनाएको छ। उद्घाटन खेलमा क्यानडालाई पराजित गरेको अमेरिकालाई सुपर एटमा पुग्न अब एक खेल जिते पुग्नेछ। उसले अब समूहमा भारत र आयरल्यान्डविरुद्ध खेल्नेछ।
सन् २००९ को विश्वकप च्याम्पियन पाकिस्तान २०२२ को फाइनलमा इंग्ल्यान्डविरुद्ध हारेको थियो। पहिलो खेलमै हारेपछि यसपालि पाकिस्तानलाई समूह चरणबाटै बाहिरिने डर बढेको छ। अब उसले अगाडि बढ्नको लागि आइतबार न्यूयोर्कमा हुने चिरपरिचित प्रतिस्पर्धी भारतलाई पनि हराउनै पर्ने अवस्था सिर्जना भएको छ।
