काठमाडौं। नेपालका राहुल विश्वकर्मा र भारतका शात मिश्र १०औँ नेपाल एमेच्योर ओपनको पहिलो दिन संयुक्तरुपमा शीर्षस्थानमा रहेका छन्।
गोकर्ण गल्फ क्लबमा आज राहुल र शातले ५–अण्डर ६७ को स्कोर खडा गरे। नेपाल नम्बर एक एमेच्योर गल्फर सद्भाव आचार्य ३–अण्डर ६९ सहित तेश्रो स्थानमा रहेका छन्। नेपालकै विजय श्रेष्ठ आइन्हाउस र साश्वत प्रधान तथा भारतका सुरज जोशी र बङ्गलादेशका सहाब उद्दिन इभन–पार ७२ सहित संयुक्तरुपमा चौथो स्थानमा रहे।
नेपालका वाङचेन ढोन्डुप र डिफेन्डिङ च्याम्पियन भारतका सुमित कोटवालले संयुक्तरुपमा आठौं स्थान बाँडे। उनीहरूले १–ओभर ७३ मा दिनको खेल पूरा गरे। नेपालका ज्ञान बहादुर ढेङ्गा २–ओभर ७४ सहित दशौं स्थानमा छन्।
पुरूष टिम स्पर्धामा नेपालको बी टिम र भारत ४–अन्डर १ सय ४० सहित संयुक्तरुपमा शीर्षस्थानमा स्थानमा छन्। नेपाल बीका लागि राहुल विश्वकर्माले ६७ र वाङचेन ढोन्डुपले ७३ को स्कोर बनाए। भारतका शात मिश्रले ६७ र सुमित कोटवालले ७३ स्कोर गरे। सद्भाव आचार्य र टासी छिरिङ सम्मिलित नेपाल टिम ए १–ओभर १ सय ४५ सहित तेस्रो स्थानमा रहेको छ।
महिलातर्फ श्रीलंकाकी काया दलुवाटेले १–अन्डर ७१ को स्कोरमा नेपालकी कश्मीरा शाह र भारतकी दिया कृश कुमारलाई एक स्ट्रोकले पछि पारेकी छिन। डिफेन्डिङ च्याम्पियन कश्मीरा र दिया इभन–पार ७२ सहित संयुक्तरुपमा दोस्रो स्थानमा रहेका छन्। भारतकी मानवी सिंघानिया १–ओभर ७३ सहित चौथो स्थानमा रहँदा ५–ओभर ७७ को स्कोरमा भारतकी अनन्थी विवेक पाँचौँ स्थानमा रहेका छन्।
पुरूषतर्फका संयुक्त लिडर राहुल र शात दुवैले फ्रन्ट नाइन २–अन्डर ३४ र ब्याक नाइन ३–अन्डर ३३ मा पुरा गरे। राहुलले तेस्रो र सातौँ होलमा एक–एक सट बचाए। यसपछि १७औँ होलमा एक सट खेर फाले पनि ११औँ, १२औँ, १५औँ र १८औँ होलमा बर्डीको सफलता प्राप्त गरे।
शातले बोगी फ्री स्कोर कार्ड तयार पार्ने क्रममा तेस्रो, छैटौँ, १५औँ, १७औँ र १८औँ होलमा एक–एक सट बचाए।नेपालका नम्बर एक एमेच्योर गल्फर सद्भावले तेस्रो र नवौँ होलको बर्डीले फ्रन्ट नाइन २–अन्डर ३४ मा सकाए। यसपछि १२औँ र १७औँ होलको बर्डीकाविरुद्ध १५औँ होलको बोगीले ब्याक नाइन १–अन्डर ३५ मा पुरा गरे।
महिलातर्फ लिडर कायाले फ्रन्ट नाइन १–अन्डर ३५ र ब्याक नाइन इभन–पार ३६ मा पुरा गरिन। उनले फ्रन्ट नाइनमा चार होलमा बर्डी प्रहार गरिन। पहिलो, तेस्रो, पाँचौँ र छैटौँ होलमा एक–एक सट बचाइन्। तर दोस्रो होलमा बोगी र चौथो होलमा डबल बोगीको सामना गरिन्। यसपछि ब्याक नाइनमा ११औँ, १५औँ र १८औँ होलमा एक–एक सट बचाइन्। तर १६औँ होलमा बोगी र १७औँ होलमा डबल बोगी प्रहार गरिन। कश्मिरा र किया दुवैले फ्रन्ट नाइन र ब्याक नाइन ईभन–पार ३६ मा सकाए।
५४ होल तीन दिने प्रतियोगितामा नेपाल, भारत, श्रीलंका, बंगलादेश र भुटान गरी पाँच देशका ६५ खेलाडीको सहभागीता रहेको छ। नेपाल गल्फ संघको आयोजनामा भएको प्रतियोगितामा राष्ट्रिय खेलकुद परिषद्, नेपाल पर्यटन बोर्ड, गोकर्ण फरेस्ट गल्फ रिसोर्ट र होटल रोयल सिंङ्गीको सहयोग रहेको छ।
आजै राष्ट्रिय खेलकुद परिषद्का सदस्य सचिव टंकलाल घिसिङले प्रतियोगिताको उद्घाटन गरेका थिए। कार्यक्रममा संघका अध्यक्ष टाशी घले, महासचिव दीपक आचार्य लगायतको उपस्थिति रहेको थियो।
-1746105523.JPG)
