काठमाडौं। सूर्य नेपाल गल्फ टुर २०२४–२५ को अन्तिम प्रतियोगिता सूर्य नेपाल प्रिमियर गल्फ च्याम्पियनसिपको तेस्रो दिन एमेच्योर खेलाडी राहुल विश्वकर्माले एकल अग्रता बनाएका छन्।
समग्रमा १६–अन्डर २ सयको स्कोरमा राहुलले साबिक विजेता तथा भारतीय गल्फ टुर खेलिरहेका सुवास तामाङलाई एक स्ट्रोकले पछि पारे। राहुलले आज ६–अन्डर ६६ स्कोर गरे।
पहिलो दिनका संयुक्त लिडर सुवासले आज बोगी रहित ५–अन्डर ६७ को स्कोर जोडे। समग्रमा उनले १५–अन्डर २ सय १ स्कोर बनाएका छन्। एमेच्योर सद्भाव आचार्यले आज ५–अन्डर ६७ को नतिजा निकाले। समग्रमा १३–अन्डर २ सय ३ स्कोरका साथ उनी तेस्रो स्थानमा छन्।
समग्रमा ११–अन्डर २ सय ५ को स्कोरमा नीरज तामाङ र भुवन नगरकोटी संयुक्तरुपमा चौथो स्थानमा रहे। भुवनले आज दिनकै उत्कृष्ट ८–अन्डर ६४ को स्कोर दर्ज गरे। नीरजले ४–अन्डर ६८ मा खेल पुरा गरे।
भुटानका निम दोर्जी तामाङ समग्रमा ८–अन्डर २ सय ८ सहित छैटौं स्थानमा छन्। उनले आज २–अन्डर ७० खेले। उनी एमेच्योरतर्फ भने तेस्रो स्थानमा छन्। समग्रमा ७–अन्डर २ सय ९ सहित दिनेश प्रजापति सातौं स्थानमा रहने क्रममा आज ४–अन्डर ६८ को नतिजा निकाले।
समग्रमा ३–अन्डर २ सय १३ सहित शुक्र बहादुर राई, सञ्जय लामा र रवि खड्का आठौं स्थानमा रहे। आज शुक्रले ३–अन्डर ६९, सञ्जयले २–अन्डर ७० र रविले १–अन्डर ७१ को स्कोर बनाए।
लिडर राहुलले आज फ्रन्ट नाईनमा बोगी रहित ५–अन्डर ३१ को उत्कृष्ट प्रदर्शन गरे। उनले पहिलो देखि तेस्रो तथा छैटौं र सातौं होलमा गरी कुल ५ बर्डी प्रहार गरे। यसपछि ११औं होलमा १ सट खेर फाल्दा १५औं र १८औं होलको बर्डीले ब्याक नाइन १–अन्डर ३५ मा सकाए।
सुवासले फ्रन्ट नाइनमा ३–अन्डर ३३ र ब्याक नाइनमा २–अन्डर ३४ खेले। यो क्रममा उनले तेस्रो, चौथो, नवौं, बार्हौं र तेर्हौ होलमा बर्डीको सफलता प्राप्त गरे।
सद्भावले दोस्रो, तेस्रो, सातौं र नवौं होलको बर्डीले फ्रन्ट नाइन ४–अन्डर ३२ मा सकाए। यसपछि ११औं होलमा डबल बोगी खेपे। तर लगत्तै १२औं होलमा इगलको सफलता प्राप्त गरे भने १८औं होलको बर्डीले ब्याक नाइन १–अन्डर ३५ मा सकाए।
नेपाल प्रोफेसनल गल्फर्स एसोसिएसनद्वारा आयोजित चार दिने प्रतियोगितामा हालसम्मकै सर्वाधिक १६ लाख नगद पुरस्कार राशि रहेको छ। विजेताले उपाधि सहित ३ लाख नगद पुरस्कार प्राप्त गर्नेछन्। दोस्रो हुने खेलाडीले १ लाख ८५ हजार, तेस्रोले १ लाख २५ हजार, चौथोले १ लाख ५ हजार र पाँचौं हुनेले ९२ हजार रुपैयाँ हात पार्नेछन्। शीर्ष २१ भित्र रहने सबै प्रोफेसनल खेलाडी नगद पुरस्कारको हकदार बन्नेछन्।
चार दिने प्रतियोगितापछि असार ७ गते (शनिबार) प्रो–एम प्रतियोगिता हुनेछ। जहाँ २५ जना प्रोफेसनल र १०० जना कर्पोरेटस्तरका एमेच्योर खेलाडीले भाग लिनेछन्।
-1750262192.jpeg)
-1750260966.webp)
