काठमाडौं । पल्सर शहीद स्मारक 'ए' डिभिजन लिग फुटबलमा न्युरोड टिम एनआरटी र मछिन्द्र क्लबले बराबरी खेल्दै अंक बाडेका छन् । सोमबार भएको खेलमा एनआरटी र मछिन्द्रले ५ - ५ गोलको बराबरी खेल्दै अंक बाडेका हुन् ।
एन्फा कम्प्लेक्स सातदोबाटोमा गोलको वर्षा भएको खेलमा एनआरटी र मछिन्द्रले बराबरी खेलेका हुन् । जारी लिगमा पहिलो पटक एकै खेलमा १० गोल भएको हो ।
मछिन्द्रका लागि विशाल राई 'ए' ले दुई गोल गर्दा खमिर गिल्सन कन्दङ्वा, अनिल गुरुङ र भासडिया डाइमण्डेले एक एक गोल गरे । एनआरटीका अशोक थापाले दुई गोल गर्दा सुनील लामा र डिडियर स्माइलले एक एक गोल गरे । एनआरटीले एक गोल आत्मघाती गोल पाएको थियो ।
पहिलो हाफमै ८ गोल भएको खेलमा सुरुवाती अग्रता भने मछिन्द्रले बनाएको थियो । पहिलो हाफको चौथो मिनेटमा विदेशी खेलाडी डाइमण्डेले गोल गर्दै मछिन्द्रलाई सुरुवाती अग्रता दिलाए । खेलको नवौं मिनेटमा मछिन्द्रका किपर दिप कार्कीले बल समात्न खोज्दा गोलमा परिणत भएपछि एनआरटीले १ - १ को बराबरी गर्यो ।
खेलको दशौ मिनेटमा विशालले गोल गर्दै मछिन्द्रलाई २ - १ को अग्रता दिलाए । अनिल गुरुङको क्रसमा विशालले सहजै गोल गरे ।
खेलको २८ औं मिनेटमा अनिलकै पासमा खमिरले गोल गर्दै मछिन्द्रको अग्रता ३ - १ को बनाए । ३० औं मिनेटमा खमिरको पासमा अनिल गुरुङले गोल गर्दै मछिन्द्रलाई ४ - १ को अग्रता दिलाए ।
३० मिनेटभित्र ४ - १ ले पछि परेपनि एनआरटी खेलमा फर्कियो । खेलको ३३ औं मिनेटमा एनआरटीका अशोक थापाले गोल गर्दै खेल ४ - २ को स्थितिमा ल्याए । लगत्तै ३४ औं मिनेटमा अशोकले व्यक्तिगत दोस्रो गोल गर्दा खेल ४ - ३ को स्थितिमा पुग्यो ।
त्यसपछि पहिलो हाफको इन्जुरी समयमा एनआरटीका सुनिल लामाले पेनाल्टीमा गोल गर्दा पहिलो हाफ ४ - ४ गोलको बराबरीमा सकियो ।
दोस्रो हाफमा पुनः मछिन्द्रले अग्रता बनायो । खेलको ६४ औं मिनेटमा उतम गुरुङको फ्रिकिकमा विशालले व्यक्तिगत दोस्रो गोल गर्दै मछिन्द्रलाई ५ - ४ को अग्रता दिलाए । तर, खेलको ८६ औं मिनेटमा एनआरटीका डिडियर स्माइलले गोल गरेपछि खेल ५ - ५ गोलको बराबरीमा सकियो ।
खेलमा एनआरटीका अशोक थापा म्यान अफ दि म्याच चुनिए ।
बराबरीसंगै ६ अंक जोडेको एनआरटी लिग तालिकाको पुछारमा यथावत रहेको छ । मछिन्द्र ७ अंक सहित तालिकाको १२ औ स्थानमा छ ।
