काठमाडौं । नेपालले विश्वकप फुटबल छनोट अन्तर्गत दोस्रो चरणको पहिलो खेलमा बिहीबार यूएईसँग खेल्दैछ । यूएईविरुद्ध 'अवे म्याच' खेल्दै नेपालले विश्वकप छनोटको दोस्रो चरणको सुरुआत गर्न लागेको हो ।
यूएईविरुद्धको खेल अघि राष्ट्रिय टिमका प्रशिक्षक भिन्सेन्जो अल्बर्टो एनिसले प्रतियोगिताका लागि आफुहरुले राम्रो तयारी गरेको बताएका छन् ।
प्रि–म्याच कन्फरेन्समा एनिसले यूएर्ई बलियो टोली रहेको उल्लेख गर्दै नेपालले समेत राम्रो तयारी गरेको बताए ।
‘हाम्रो टिममा युवा खेलाडीको बाहुल्यता छ । त्यसैले टोलीमा जोश छ ।’ एनिसले पत्रकार सम्मेलनमा भने, ‘प्रशिक्षकको रुपमा मेरो टिमले धेरै बलिया टिमविरुद्ध खेलेको अनुभव छ । त्यसैले बलिया टिमको स्तरबाट जानकार छौं ।’
यूएई राम्रो टिम भएको उल्लेख गर्दै प्रशिक्षक एनिसले नेपाली टिम भने नडराएको प्रस्ट पारे । ‘यूएई राम्रो टोली हो र तर हामी डराएका छैनौं । म यसलाई हरेक पटक आउने नयाँ चुनौतीको रुपमा लिन्छु ।’ उनले थपे ।
एनिसले यूएईविरुद्ध आफुहरु गम्भिर रहेको बताउँदै उत्कृष्ट प्रर्दशन गर्ने दाबी गरे ।
नेपाल रहेको समूह एचको खेलमा यूएई सहित बहराईन र यमन समावेश छन् । नेपालले लाओसलाई पहिलो चरणमा हराउँदै दोस्रो चरणमा स्थान बनाएको हो ।
राष्ट्रिय टिमका कप्तान किरण चेम्जोङले यूएईविरुद्ध खेल्न टिम तयार रहेको बताए ।
‘धेरै राम्रा खेलाडीसँग करियरको दौरान खेल्न मौका पाएको छु । पछिल्लो विश्वकपमा अष्ट्रेलियासँग खेलेको अनुभव छ । म टिमको रक्षा गर्न तयार छु ।’ किरणले पत्रकार सम्मेलनमा भने ।
यूएईका प्रशिक्षक बेन्टोले नेपाललाई कमजोर टोलीका रुपमा नलिने बताउँदै आफ्नो स्तर अनुसारको खेल प्रर्दशन गर्ने बताए ।
‘हामीले लामो तयार गरेका छौं । नेपालविरुद्ध स्पष्ट तीन अंक जोड्न चाहन्छौं । हामी समूहको उत्कृष्ट हुने प्रयासमा छौं ।’ उनले भने ।
