काठमाडौं । आईसीसी एकदिवसीय विश्वकप क्रिकेटमा बिहीबार अष्ट्रेलिया र साउथ अफ्रिकाबीच प्रतिस्पर्धा हुदैछ । लखनउमा हुने खेल दिउँसो सवाँ २ बजे सुरु हुनेछ । दुवै टिम प्रतियोगिताको आफ्नो दोस्रो खेलमा आमनेसामने हुदैछन् ।
विश्वकपका प्राय भेटमा साउथ अफ्रिकामाथि अष्ट्रेलिया हाबी हुदै आएको छ । तर अफ्रिकी टिमको पछिल्लो प्रर्दशनले उसलाई विश्वकप क्रिकेटको दाबेदार टोली बनाईदिएको छ । श्रीलंकाविरुद्धको कीर्तिमानी योगफल र एकै खेलमा तीन अफ्रिकी खेलाडीको शतकले साउथ अफ्रिका प्रतियोगिताको एक बलियो टिमको रुपमा आएको छ ।
अफ्रिकी टिमले विश्वकपमा धुवाधार सुरुआत गरेपनि अष्ट्रेलियाका लागि सुखद रहन सकेन । पहिलो खेलमा अष्ट्रेलियाले भारतसँगको खेल सजिलै गुमाएको थियो । पाँच पटकको विश्वकप च्याम्पियन अष्ट्रेलिया समेत उपाधिको दाबेदार टिम हो । सोही कारण दुई ठुला टिमबीचको भिडन्तलाई महत्वका साथ हेरिएको छ ।
अफ्रिकी टिमका एडेन मार्करामको विश्वकपमा सबैभन्दा छिटो शतक, सम्भवत अन्तिम ठुलो प्रतियोगिता खेलिरहेका क्विटन डी ककको शतक र रासी वान डेर डुसेनको शानदार शतक श्रीलंकाविरुद्ध प्रहार भएका थिए । तल्लो क्रममा रहेका डेविड भिलर र हेनरिक क्लासेनको उत्कृष्ट ब्याटिङ प्रर्दशनले अफ्रिकी टिम उपाधि लक्ष्य सहित भारत भ्रमणमा निस्किएको देखिन्छ ।
साउथ अफ्रिकाका ब्याटिङ क्षमता अष्ट्रेलियालाई पनि थाहा छ । विश्वकप खेल्नुअघि घरमै अष्ट्रेलियन टिमले साउथ अफ्रिकाविरुद्धको सिरिज ३–२ ले गुमाएको थियो । जसमा सुरुआती दुई खेल अष्ट्रेलियाले हारेको थियो ।
अष्ट्रेलिया प्रतियोगितामा पहिलो जितको खोजीमा छ । उसले स्पिनरसँगको समस्याको समाधान अफ्रिकी टिमसँग खेल्दा फेला पार्ने अपेक्षा गरिएको छ । आईपीएलमा लखनउबाट खेलिरहेका मार्कस स्टोइनिसको अनुभव अष्ट्रेलियालाई सहयोगी हुन सक्छ । स्पिनमा अष्ट्रेलियाले भोगिरहेको समस्याका कारण अफ्रिकी टिमले केशव महाराजसँगै तबरेज शम्सीलाई मौका दिन सक्छ ।
