एजेन्सी । इंग्लिश प्रिमियर लिग फुटबलमा साबिकको विजेता म्यानचेस्टर सिटी पराजित भएको छ । बुधबार भएको खेलमा १० खेलाडीमा सिमित म्यानचेस्टर सिटी लेष्टर सिटीसंग २ - १ गोल अन्तरले पराजित भएको हो ।
बक्सिङ डेको दिन सुरुवाती अग्रता जोगाउन नसक्दा सिटी पराजित भएको हो । लेष्टरलाई जित दिलाउन मार्क अल्ब्राईटन र रोकार्डो पेरिराले एक एक गोल गरे । सिटीका लागि बर्नान्डो सिल्भाले एक गोल गरे ।
किङ पावर स्टेडियममा खेलको १४ औं मिनेटमा सिल्भाको गोलबाट सिटीले सुरुवाती अग्रता बनाएको थियो । तर, खेलको १९ औं मिनेटमा अल्ब्राईटनले गोल गर्दै लेष्टरलाई १ - १ गोलको बराबरीमा ल्याए ।
पहिलो हाफ १ - १ गोलको बराबरीमा सकिएको खेलको दोस्रो हाफमा लेष्टरका पेरिरा चम्किए । खेलको ८१ औं मिनेटमा पेरिराले गोल गर्दै लेष्टरलाई २ - १ को महत्वपूर्ण जित दिलाए ।
यस्तै खेलको ८९ औं मिनेटमा फाबियन डेल्फले रातो कार्ड पाएपछि सिटी खेलको केहि मिनेट १० खेलाडीमा समेटिएको थियो ।
हारसंगै सिटीको उपाधि होडमा धक्का लागेको छ । र, सिटी लिगको तेस्रो स्थानमा झरेको छ । सिटीले ४४ अंक जोडेको छ । सिटीले शीर्ष स्थानको लिभरपुलविरुद्ध अंक दुरी कम गर्ने मौका समेत गुमाएको छ ।
जितपछि लेष्टर २८ अंक जोडेर सातौं स्थानमा रहेको छ ।
