एजेन्सी । विश्व फुटबलमा सन् २०१८ को बर्ष निकै सुन्दर रह्यो । फुटबलको सर्वाधिक ठुलो प्रतियोगिता फिफा विश्वकप यसै बर्ष आयोजना भयो ।
सधै झैँ युरोपियन क्लब फुटबलमा निकै प्रतिस्पर्धा भयो । केहि रोचक घटना भए । च्याम्पियन्स लिग होस् या घरेलु लिग । सबै लिगको प्रतिस्पर्धा उस्तै रह्यो ।
अब विश्व फुटबलले रोमान्चक बर्ष सन् २०१८ लाई केहि दिनपछि विदाई गर्दै नयाँ बर्षको स्वागत गर्दैछ । तर, विश्व फुटबलमा सन् २०१८ को बर्ष यादगार बन्नेछ ।
कारण, यस बर्ष विश्व फुटबलमा अनौठा घटना देखि रोचक घटनाहरु घटे । जुन फुटबल पछ्याउने समर्थकहरुले सधै सम्झिरहने छन् ।
सन् २०१८ मा भएका केहि मुख्य घटनाहरु :
एमबाप्पेको उदय
रुस विश्वकप दौरान चर्चित बने – फ्रान्सका केलियन एमबाप्पे ।
हुन त एमबाप्पे विश्वकप अगाडी नै चर्चाका पत्र बनिसकेका थिए । तर, विश्वकपमा १९ बर्ष पुगेका एमबाप्पेको प्रदर्शनले सबैलाई आकर्षित गरेको थियो ।
रुस विश्वकप एमबाप्पेकै टिम फ्रान्सले जितेको थियो । जसमा एमबाप्पेको उच्च प्रदर्शन र गोल महत्वपूर्ण रह्यो । विश्वकपमा एमबाप्पे उत्कृष्ट युवा खेलाडी घोषित भए ।
एमबाप्पेले विश्वकपको फाइनलमा क्रोएसियाविरुद्ध गोल समेत गरे । र, एमबाप्पे ब्राजिलियन लिजेण्ड पेलेपछि विश्वकपको फाइनलमा गोल गर्ने दोस्रो युवा खेलाडी बने । उनले अर्जेन्टिनाविरुद्ध गरेको गोल समेत सबैले सम्झिरहने छन् ।
एमबाप्पेले लियोनल मेस्सी र क्रिस्टियानो रोनाल्डोको कीर्तिमानी प्रदर्शनलाई जित्ने खेलाडीको रुपमा हेरिएको छ । त्यसैले यस बर्ष एमबाप्पेको उदय भएको बर्ष मानिएको छ । पेरिस सेन्ट जर्मेन (पिएसजी) का एमबाप्पेले यस सिजन १३ खेलमा ११ गोल गरिसकेका छन् ।
आर्सनलबाट वेंगरको विदाई
प्रशिक्षक आर्सेन वेंगरले इंग्लिश क्लब आर्सनलमा २२ बर्ष बिताए । तर, यसै बर्ष प्रशिक्षक वेंगरले क्लबबाट विदाई पाए ।
सन् २०१७-१८ को सिजन सकिए लगत्तै प्रशिक्षक वेंगरले क्लब छाडेको घोषणा गरे । २२ बर्ष आर्सनल बसाईमा उनले क्लबलाई धेरै उपाधि दिलाए । तर, पछिल्लो सिजन आर्सनलको खस्कतो प्रदर्शनले आर्सनल प्रशिक्षक वेंगरबाट सन्तुष्ट थिएनन् । त्यसैले वेंगरले आर्सनलसंगको २२ बर्षे लामो यात्रा अन्त्य गर्ने निर्णय गरे ।
सन् १९९६ बाट प्रशिक्षक रहेका वेंगरले आर्सनललाई ३ पटक लिग च्याम्पियन र ७ पटक एफए कपको उपाधि दिलाएका थिए । फ्रान्सका पुर्व मिडफिल्डर समेत रहेका ६८ बर्षिय वेंगरले आर्सनललाई ७ पटक नै कम्युनिटी शिल्डको उपाधि दिलाएका थिए । वेंगरले आर्सनलमा २२ बर्ष बिताउदा १२ सय २८ खेलमा ७०४ जित दिलाएका छन् ।
विश्व फुटबलमा सन् २०१८ मा वेंगरको विदाईलाई महत्वपूर्ण घटना मानिएको छ ।
पेनाल्टीमा इंग्ल्यान्डको सफलता
रुस विश्वकप फुटबलमा इंग्ल्यान्डको सेमिफाइनल सम्मको यात्रालाई समेत यस बर्षको महत्वपूर्ण घटनाको रुपमा हेरिएको छ ।
जसमध्ये इंग्ल्यान्डले अन्तिम १६ मा कोलम्बियाविरुद्धको पेनाल्टी जित महत्वपूर्ण मानिएको छ । किनकी इन्ग्लिश टोली प्राय ठुला प्रतियोगिताको पेनाल्टी सुटआउटमा चुक्दै आईरहेको थियो । तर, रुस विश्वकपमा भने इंग्ल्यान्ड सफल भयो ।
इंग्ल्यान्डले कोलम्बियालाई पेनाल्टी सुटआउटमा ४ – ३ गोल अन्तरले हराएर क्वाटरफाइनलको यात्रा तय गरेको थियो । पेनाल्टी सुटआउटमा इंग्ल्यान्डका किपर जोर्डन पिकफोर्ड र एरिक डायर नायक बनेका थिए ।
म्यानचेस्टर सिटीको १०० अंक
गत सिजनको प्रिमियर लिग फुटबलमा म्यानचेस्टर सिटीले ऐतिहासिक सफलता हात पार्यो । सिटीले उपाधि मात्र हात पारेन लिगको अंक तालिकामा समेत शतकीय अंक हात पार्यो ।
सिटीले गत सिजन ३८ खेलबाट १०० अंक जोडेर उपाधि जितेको थियो । सिटी प्रिमियर लिगमा एकै सिजन १०० अंक जोड्ने पहिलो क्लब समेत बन्यो । सिटीले उक्त सिजन २ खेल गुमाउदा ४ बराबरी र ३२ खेलमा जित निकालेको थियो ।
सिटीले अन्तिम खेलमा साउथह्याम्पटनलाई १ – ० गोल अन्तरले हराउँदै उक्त किर्तिमानी अंक जोडेको थियो । सिटीलाई जित दिलाउन ग्याब्रियल जिससले निर्णायक गोल गरेका थिए । यस्तै सिटीले उक्त सिजन बिपक्षिको पोष्टमा १०६ गोल गरेको थियो ।
विश्वकपमा जर्मनीको खराब प्रदर्शन
सन् २०१८ को विश्वकपमा जर्मनीको प्रदर्शन खराब रह्यो । जसको कारण जर्मनी समूह चरणबाटै बाहिरिन पुग्यो ।
समूह 'एफ' मा रहेको जर्मनीले समूह चरणमा मात्र ३ अंक जोडेको थियो । समूह चरणमा जर्मनी दक्षिण कोरियासंग समेत २ – ० ले पराजित भएको थियो ।
यस घटनालाई समेत सन् २०१८ को फुटबलमा मुख्य घटनाको रुपमा हेरिएको छ ।
च्याम्पियन्स लिगको फाइनल
सन् २०१७/१८ को सिजनको च्याम्पियन्स लिगको फाइनलमा स्पेनिस क्लब रियल मड्रिड र इंग्लिश लिभरपुल प्रतिस्पर्धा गरेका थिए ।
युक्रेनको किभमा भएको फाइनलमा लिभरपुलमाथि ३ – १ को जित निकाल्दै रियलले १३ औं पटक च्याम्पियन्स लिगको उपाधि उचालेको थियो । तर, च्याम्पियन्स लिगको फाइनलमा केहि घटना भए जुन विश्व फुटबलले लमी समय सम्झिरहनेछ ।
उक्त फाइनलको दौरान लिभरपुलका गोलकिपर लोरिस कारिसको प्रदर्शन बिर्सनलायक रह्यो । रियलको लागि ग्यारेथ बेल र करिम बेन्जिमा चम्किए । यस्तै रियलका कप्तान सर्जियो रामोसको खराब ट्याकल चर्चामा रह्यो ।
गत सिजन निकै उच्च लयमा रहेको लिभरपुलका फरवार्ड मोहमद सलाह रुँदै मैदानबाट बाहिरिन पर्यो । रामोसको खराब ट्याकलले सलाह घाइते हुँदै मैदानबाट बाहिरिएका थिए । उक्त खेलपछि रामोसले धेरै दुश्मनी कमाएका थिए । सलाह मैदानबाट बाहिरिएपछि लिभरपुलको उपाधि जित्ने सपना असफल भएको थियो ।
यस्तै लिभरपुलका गोलकिपर कारिसले पटक पटक गल्ती गर्दा रियलले गोल गर्दै उपाधि उचालेको थियो । च्याम्पियन्स लिगको खराब प्रदर्शन लगत्तै कारिसलाई लिभरपुलले बेचेको थियो ।
च्याम्पियन्स लिगमा रोनाल्डोको गोल
गत सिजन पोर्चुगिज फरवार्ड क्रिस्टियानो रोनाल्डो चर्चामा रहे । जतिबेला रोनाल्डो स्पेनिस क्लब रियल मड्रिडबाट खेल्ने गर्थे ।
हाल इटालियन क्लब युभेन्ट्स रहेका रोनाल्डोले च्याम्पियन्स लिगको दौरान गरेको बाइसाइकल किक गोलको चर्चा अहिले पनि हुने गर्दछ ।
च्याम्पियन्स लिग अन्तर्गत क्वाटरफाइनलको पहिलो लेगमा युभेन्ट्सविरुद्ध रोनाल्डोले उक्त उत्कृष्ट गोल गरेका थिए । जुन खेल रियलले ३ – ० ले जितेको थियो । संयोग रोनाल्डो यस सिजन युभेन्ट्सबाटै खेलिरहेका छन् ।
बार्सिलोनाविरुद्ध रोमाको पुनरागमन जित
सन् २०१८ मा घटेका मुख्य घटनामा इटालियन क्लब रोमाको पुनरागमन जित पनि प्रमुख हो । च्याम्पियन्स लिगको दौरान रोमाले बार्सिलोनाविरुद्ध निकालेको जित अहिले पनि सम्झिने गरिन्छ ।
च्याम्पियन्स लिगको क्वाटरफाइनलको पहिलो लेगमा रोमा बार्सिलोनासंग ४ – १ ले पछि रहेको थियो । तर, दोस्रो लेगमा रोमाले सनसनी प्रदर्शन गर्दै ३ – ० को जित निकालेको थियो । दोस्रो लेगको खेलपछि समग्रमा ४ – ४ गोलको बराबरी भयो । तर, अवे गोलको आधारमा रोमा अघि रहदै सेमिफाइनलमा पुग्यो । बार्सिलोना भने प्रतियोगिताबाट बाहिरिएको थियो ।
च्याम्पियन्स लिगमा उत्कृष्ट पुनरागमन गर्ने रोमा तेस्रो टोली समेत बनेको थियो ।
मोरिन्होको बर्खास्ती र सोल्सायरको नियुक्ति
सन् २०१८ को पुर्व सन्ध्यामा प्रशिक्षक जोसे मौरिन्होको बर्खास्ती पनि चर्चामा रह्यो ।
इंग्लिश प्रिमियर लिगमा निरन्तर खराब प्रदर्शन गरेपछि म्यानचेस्टर युनाइटेडले मोरिन्होलाई बर्खास्त गरेको थियो । प्रिमियर लिग अन्तर्गत लिभरपुलविरुद्धको खेलमा ३ – १ ले पराजित भएपछि युनाइटेडले मोरिन्होलाई हटाएको थियो ।
लगत्तै युनाइटेडले पूर्व फरवार्ड तथा नर्वेजीयन प्रशिक्षक ओले गुनर सोल्सायरलाई केयरटेकर प्रशिक्षक नियुक्त गरेको थियो । सोल्सायरको पहिलो प्रशिक्षणमा युनाइटेडले सहज जित समेत निकालेको थियो ।
- एजेन्सीको सहयोगमा
