एजेन्सी । जर्मन बुन्डेस लिगा फुटबलमा लिग लिडर बोरुसिया डर्टमण्डले ९ अंकको अग्रता कायम गरेको छ ।
शुक्रबार राति भएको खेलमा बोरुसिया मोन्चेनग्लाडवाचलाई २ - १ गोल अन्तरले हराउँदै डर्टमण्डले फराकिलो अग्रता कायम राखेको हो ।
घरेलु मैदानमा डर्टमण्डलाई जित दिलाउन जाडोन सान्चो र मार्को रिउसले एक एक गोल गरे । मोन्चेनग्लाडवाचका क्रिस्टोफ क्रामेरले एक गोल फर्काए ।
खेलको ४२ औं मिनेटमा सान्चोले गोल गर्दै डर्टमण्डलाई सुरुवाती अग्रता दिलाएका थिए । तर,४५ औं मिनेटमा मोन्चेनग्लाडवाचका क्रिस्टोफले गोल गर्दै खेल १ - १ को बराबरीमा ल्याए ।
पहिलो हाफ १ - १ गोलको बराबरीमा सकिएको खेलको दोस्रो हाफमा डर्टमण्डका लागि रिउस नायक बने । खेलको ५४ औं मिनेटमा रिउसले गोल गर्दै डर्टमण्डलाई २ - १ महत्वपूर्ण जित दिलाए ।
जितसंगै उपाधि होडमा बलियो रहेको डर्टमण्डले १७ खेलबाट ४२ अंक जोडेको छ । र, दोस्रो स्थानको मोन्चेनग्लाडवाच भन्दा ९ अंकले अघि छ । मोन्चेनग्लाडवाचको ३३ अंक छ । लिगमा साबिकको विजेता वायर्न म्युनिख ३३ अंक जोडेर तेस्रो स्थानमा छ ।
