छहारी क्वाटरफाइनलमा

काठमाडौं । छहारी ३६१ डिग्री पाँचौं पिस प्वाइन्ट कप अन्तरविद्यालय छात्र फुटबल प्रतियोगितामा शुक्रबार क्वाटरफाइनलमा प्रवेश गरेको छ ।

छहारीले सनसाइनलाई १०–० को फराकिलो गोलअन्तरले पराजित गर्यो । छहारीको सहज जितमा ‘म्यान अफ द म्याच’ निशान्त तामाङ र सन्दिप पाख्रिनले ह्याट्रिक गरे । अरुण घिसिङले २ तथा सम्राट तामाङ र राकेश गिरीले १–१ गोल थपे ।

पिस प्वाइन्ट बोर्डिङ स्कुलद्वारा आयोजित प्रतियोगितामा नोबेल एकेडेमी र क्याम्ब्रिजले पनि क्वाटरफाइनलमा स्थान पक्का गरे ।

नोबेलले रिभेरालाई ४–० गोलले हरायो । नोबेलका साइफोन श्रेष्ठले २ तथा ‘म्यान अफ द म्याच’ सुजल श्रेष्ठ र आयुश रावतले १–१ गोल गरे । क्याम्ब्रिजले ज्ञान निकेतनलाई २–० ले पाखा लगायो । क्याम्ब्रिजका जेनिश अधिकारी र अश्विन शर्माले १–१ गोल गरे ।

शुक्रबारको खेलसंगै क्वाटरफाइनल समीकरण पूरा भएको छ । क्वाटरफाइनल आयोजक पिस प्वाइन्ट र लिबर्टी, प्रस्फुटन र सिद्धार्थ बनस्थली, नेपाल तारा र नोबेल तथा छहारी र क्याम्ब्रिजबीच हुनेछ । चारै क्वाटरफाइनल आइतबार हुनेछ ।