भूपू सैनिकलाई उपाधि

हिमालयन मनोज, वालिङ। भूपू सैनिक वालिङले शब्द चिन्तन पर्वतलाई १–० गोलअन्तरले पराजित गर्दै १०औं संस्करणको अर्हन्त मेमोरियल कप फुटबल प्रतियोगिताको उपाधि जितेको छ।

खेलको १२औं मिनेटमा आभिषेक परियारले गरेको एकमात्र गोल नै निर्णायक सावित भयो। फाइनल खेलको ‘म्यान अफ द म्याच’ पनि गोलकर्ता परियार घोषित भए।

प्रतियोगितामा उत्कृष्ट गोलरक्षकको उपाधि भूपू सैनिकका शिशिर परियारले जिते भने उत्कृष्ट डिफेन्डर शब्द चिन्तनका दिकबहादुर रानालाई प्रदान गरियो। त्यसैगरी उत्कृष्ट मिडफिल्डर भूपू सैनिकका अनिश राना घोषित भए।

प्रतियोगिताको ‘फेयर प्ले टिम’ आर्मडी इङ्लिस बोर्डिङ चयन भयो। भूपू सैनिकका प्रशिक्षक प्रदीप क्षेत्री उत्कृष्ट प्रशिक्षक घोषित भए भने प्रतियोगिताको ‘प्लेयर अफ द टुर्नामेन्ट’ उपाधि पनि भूपू सैनिककै अनमोल विकले हात पारे।