लिभरपुलमाथि वुल्भको सनसनीपूर्ण जित

काठमाडौं। पुछारमा रहेको वुल्भरह्याम्प्टन वान्डरर्सले मंगलबार मोलिन्यू स्टेडियममा प्रिमियर लिग च्याम्पियन लिभरपुललाई २–१ ले हराउँदै सनसनीपूर्ण जित दर्ता गरेको छ।

ब्राजिली मिडफिल्डर आन्द्रेले इन्ज्युरी समयको चौथो मिनेटमा डिफ्लेक्ट भएको निर्णायक गोल गर्दै लिभरपुलको अर्को सिजन च्याम्पियन्स लिगमा स्थान सुरक्षित गर्ने आशामा ठूलो धक्का दिएका हुन्। उनको गोलसँगै रंगशालामा उपस्थित वुल्भ्स समर्थकहरू उल्लासित बने।

वुल्भ्सका प्रशिक्षक रोब एड्वर्ड्स आन्द्रेको गोलपछि साइडलाइनतर्फ दौडिँदै खुसीयाली मनाएका थिए। रेलिगेसनतर्फ उन्मुख देखिएको सिजनमा यो दुर्लभ खुसीको क्षण बनेको उनले बताए।

‘यो लिभरपुल फुटबल क्लब हो। हामी अहिले जुनसुकै स्थानमा भए पनि उनीहरूलाई हराउँदा त्यो क्षणको आनन्द लिनैपर्छ,’ एड्वर्ड्सले भने।

खेलको अन्त्य निकै नाटकीय रह्यो। ७८औँ मिनेटमा रोड्रिगो गोमेसले वुल्भ्सलाई अग्रता दिलाएपछि ८३औँ मिनेटमा मोहम्मद सलाहले गोल गर्दै लिभरपुलका लागि बराबरी गरेका थिए। यससँगै सलाहले लिगमा १० खेलको गोलखडेरी तोडे।

दुवै टोली जितका लागि आक्रामक बनेका बेला आन्द्रेको टाढाबाट प्रहार गरिएको बल जो गोमेजमा ठोक्किएर दिशा परिवर्तन भयो र लिभरपुलका गोलकिपर एलिसन गलत दिशातर्फ परे।

‘अविश्वसनीय अनुभव भयो। यो अद्भुत खेल र अद्भुत रात थियो,’ गोमेसले भने। यो सिजन लिभरपुलको लिगमा नवौं हार हो। बुधबार चेल्सीले एस्टन भिल्लालाई हराए लिभरपुल छैटौं स्थानमा झर्न सक्छ।

शीर्ष चार टोलीले च्याम्पियन्स लिगका लागि प्रत्यक्ष स्थान पाउँछन्। यद्यपि यस सिजन युरोपेली प्रतियोगितामा अंग्रेजी क्लबहरूको प्रदर्शनका कारण प्रिमियर लिगले पाँचौं बोनस स्थान पनि पाउने सम्भावना बलियो छ।

गत सिजन उपाधि जितेको लिभरपुल अहिले शीर्ष स्थानको आर्सेनलभन्दा १६ अंकले पछाडि छ।

लिभरपुलका प्रशिक्षक आर्ने स्लोटले भने, ‘हामी धेरै खेल हारिरहेका छौं र अंक गुमाइरहेका छौं। पछिल्ला २२ खेलमध्ये हामीले हारेका तीनै खेल अतिरिक्त समयमा भएका छन्।’

वुल्भ्सका लागि भने यो सिजन लिगमा पहिलो पटक लगातार दुई जित हो। उसले शुक्रबार एस्टन भिल्लालाई २–० ले हराएको थियो।

सुरक्षात्मक स्थानभन्दा ११ अंकले पछाडि रहेकाले रेलिगेसनबाट बच्ने सम्भावना कम देखिए पनि वुल्भ्सले सिजन अन्त्यतिर राम्रो लय समातेको छ। हालै उसले आर्सेनलसँग २–२ को बराबरी खेलेको थियो।

‘हामी अहिले संघर्ष, जुझारूपन र गुणस्तर देखाइरहेका छौं। हामी सबैसँग प्रतिस्पर्धा गरिरहेका छौं,’ एड्वर्ड्सले भने।