काठमाडौं । युनाइटेड अरब इमिरेट्स (युएई) का बलर मोहमद नाभिदले टिभिएस एभरेष्ट प्रिमियर लिग (ईपीएल) टी-ट्वान्टी क्रिकेट खेल्ने भएका छन् ।
आगामी मंसिर दोस्रो साताबाट आयोजना हुने ईपीएलमा तीब्र गतिका बलर नाभिदले भैरहवा ग्लाडीएटर्सबाट खेल्ने भएका हुन् । शरद भेषवाकरको कप्तानीमा रहेको भैरहवाले नाभिदलाई अनुबन्ध गरेको जनाएको छ ।
ईपीएल आगामी मंसिर २२ देखि पुस ६ गतेसम्म सञ्चालन हुनेछ । र, प्रतियोगिताका लागि आयोजकले प्रत्येक टिमले ३ विदेशी खेलाडी अनुबन्ध गर्नुपर्ने नियम बनाएको छ । जस अनुसार भैरहवाले नाभिदलाई अनुबन्ध गरेको हो । अनुबन्धको रकम भने खुलाईएको छैन ।
आक्रामक ब्याटिङ गर्न सक्ने नाभिदले गत महिना सम्पन्न पोखरा प्रिमियर लिग (पीपीएल) क्रिकेट खेलेका थिए । उनले शरदकै कप्तानीमा रहेको पोखरा पल्टनबाट खेलेका थिए । पीपीएल पोखरा पल्टनले नै जितेको थियो । भैरहवा गत संस्करणको ईपीएलको उपविजेता टोली समेत हो ।
नाभिदले युएईबाट ३२ एकदिवसीय अन्तर्राष्ट्रिय र २३ टी-ट्वान्टी क्रिकेट खेलिसकेका छन् । भैरहवाले ईपीएलका लागि नाभिदलाई भित्र्याउन पाउदा अन्त्यत खुसी लागेको जनाएको छ ।
