मनोरञ्जनको ‘गुप्तबास’

काठमाडौं । नेपाल भलिबल संघको चुनाव सरगर्मी सुरु भएको छ । देशभर सञ्जाल रहेको भलिबलको अधिकांश जिल्ला र प्रदेशमा नयाँ कमिटी आएका छन् । संघले पूर्ण बैठकमार्फत केन्द्रिय निर्वाचनको मिति पनि तय गर्दैछ । तर भलिबल संघको यत्रो चुनावी भाग दौडमा संघका वर्तमान अध्यक्ष मनोरञ्जनरमण शर्मा कतै देखिदैनन् ।

गत जेठ २० गते संघको केन्द्रिय कार्यसमितिको पूर्ण बैठक पोखरामा बस्यो । अध्यक्ष शर्मानै अनुपस्थित रहे । बैठकको अध्यक्षता याम गुरुङले गरे । बैठक पोखरामा चल्दै गर्दा शर्मा भने उपचारका लागि भारतमा रहेको सन्देश पठाए । बैठकले असार १० भित्र प्रदेश र जिल्ला निर्वाचन सक्ने निर्णय गर्यो । सोही अनुसार जिल्ला र प्रदेशमा नयाँ कार्यसमिति गठन भए । तर शर्मा कतै देखिएनन् । न त सार्वजनिक रुपमा कुनै शुभकामना, बधाई सन्देशनै सामाजिक सञ्जालमा पोस्टिए । सार्वजनिक रुपमा उनी राखेपका पूर्व सदस्य सचिव शरदचन्द्र शाहको फोटो प्रर्दशनीमा देखिएका थिए । त्यसबाहेक भलिबल र खेलकुद सम्बन्धि कुनै पनि गतिविधिमा शर्मा देखिदैनन् ।  

त्यसअघि शर्मा लामो बिदामा अमेरिका गएका थिए । अमेरिकाबाट नफर्कन सक्ने भन्दै उनले कार्यवहाक समेत तोक्ने काम गरे । कार्यवहाक तोकेर पनि लामो समय उनी नेपालमै बसे । केही समय अमेरिकामा बिताए । पुन नेपाल फर्किए । निष्कृय जस्तै बसे । जब महिला भलिबल टिमले एभीसी सेन्ट्रल जोनको उपाधि जितेर फर्कियो, खेलाडी स्वागत कार्यक्रममा एयरपोर्टमा शर्माले बुर्कुसी मारेको तस्विर भाइरल बनेको थियो । महिला टिमको सफलतासँगै उनी संघको केही कार्यक्रममा पनि देखिए । त्यसपछि पुन संघका गतिविधिबाट हराए जस्तै भए ।

‘संघको अध्यक्ष भैसकेपछि यत्रो निर्वाचनमा चासो, चिन्ता राख्नपर्ने हो । निर्वाचनमार्फत नयाँ नेतृत्वलाई जिम्मेवारी सुम्पिनु पर्ने हो । तर अध्यक्षकै अतोपतो देखिएन । गुप्तबासै बसेको जस्तो देखियो ।’ संघका एक जना नेताले भने । 

शर्माले ६ वर्ष संघ चलाउने मौका पाए । चार वर्षमा नयाँ नेतृत्व आउन पर्ने हो तर विभिन्न कारणले संघको निर्वाचन समयमा नहुदाँ वर्तमान कार्यसमितिले ६ वर्ष संघ चलाईसकेको छ । यस बीचमा महिला भलिबल टिमले साग खेलकुदमा ऐतिहासिक रजत पदक हात पार्यो । अन्तराष्ट्रिय स्तरमा दुई पटक महिला एभीसी सेन्ट्रल जोनको उपाधिनै जित्यो । यि सबै शर्माकै कार्यकालमा भए । तर भलिबलको संस्थागत विकास, व्यवस्थापकीय सुधार, पारदर्शीता, सुशासन कायम गर्नमा शर्माले कुनै जाँगर चलाएनन् । ग्रासरुट कार्यक्रम, विभिन्न उमेर समूहका प्रतियोगिता, खेलको व्यवसायीकरण जस्ता खेलकुदका आधारभुत काममा उनले हातै हालेनन् । 

सरकारले पटक पटक भलिबलको छुट्टै कभर्डहल बनाउन बिनियोजन गरेको रकम ‘फ्रिज’ भएर गयो । आर्थिक चलखेल गर्न पाईने केही प्रतियोगिता, कार्यक्रममा मात्र संघका सिमित पदाधिकारीको सक्रियता देखियो । संघको काम वर्षका एक, दुई राष्ट्रिय प्रतियोगिता गर्न बाहेक अरु देखिएन । संघको केन्द्रिय कार्यालयबाट हराएका बल मुस्ताङ सहित विभिन्न जिल्लामा फेला परे । संघको खाताबाट आफु खुसी केही पदाधिकारी पैसा निकाल्ने काम गरे । केही सिमित पदाधिकारीले ‘इन्जोए’ गरे । करोड बढी रकमको कारोबार गर्ने संघको आर्थिक प्रतिवेदन काजगको खोस्टोमा पढेर सुनाउने प्रलचन जारीनै रह्यो । तर यि तमाम कमजोरी र अराजकतामा संघका अध्यक्ष बेखबर रहे, अन्जान बसे ।

मनोरञ्जनरमण शर्माको स्वभाव नाम जस्तै छ, उनलाई खुबै रमाईलो गर्न पर्छ । शर्मा संघका औपचारिक कार्यक्रमको दौरान भाषणको क्रममा गित गाउनेदेखि ताली बजाउने सम्मको हास्य रस खुबै प्रदान गर्छन् । ब्यक्तित्वको हिसाबले मनोरञ्जनलाई खोट लगाउने ठाउँ छैन, उनी आफैपनि पुगिसरी आएको सामाजिक ब्यक्तित्व हुन् । कहिले काही लाग्छ, संघलाई पनि उनले नाम जस्तै मनोरञ्जन गर्ने ठाउँ बनाए । भलिबल संघमा शर्माको ६ वर्षे कार्यकाल हेरेर मनोरञ्जन लिन सकिन्छ, सन्तुष्ट हुन सकिदैन ।