एपीएफलाई हराउँदै पुलिस च्याम्पियन

काठमाडौं । विभागीय टोली नेपाल पुलिस क्लबले बागमती प्रदेश न्यू डायमन्ड कप खुल्ला महिला राष्ट्रिय भलिबल प्रतियोगिताको उपाधि जितेको छ ।

कीर्तिपुरस्थित मल्टी प्रजोज कभर्डहलमा शनिबार भएको फाइनलमा अर्को विभागीय टोली एपीएफ क्लबलाई ३-० को सोझो सेटमा हराउँदै पुलिस च्याम्पियन बनेको हो ।

पुलिसले एपीएफमाथि २५-१६ २७-२५ र २५-१९ को स्कोरमा जित निकालेको हो । पुलिस अपराजित रहदै च्याम्पियन बनेको हो ।  

उपाधिसँगै पुलिसले ५ लाख नगद प्राप्त गरेको छ । उपविजेता एपीएफले २ लाख ५० हजार पाएका छन् ।   

त्यस्तै तेस्रो भएको न्यु डायमन्ड स्पोर्ट्स क्लबले १ लाख २५ हजार र चौंथो परोपकार आदर्श माविले ७५ हजार नगद पुरस्कार प्राप्त गरेका छन् । 

शनिबारै परोपकारलाई २५–१२, २५–१४ र २५–२३ को सोझो सेटमा जित निकाल्दै आयोजक न्यु डायमन्डले तेस्रो स्थान हासिल गरेको छ ।  

पुलिसकी कोपिला राना प्रतियोगिताको सर्वाेत्कृष्ट खेलाडी चुनिँदै २५ हजार रुपैयाँ र ट्रफी हात पारिन् । न्यु डायमन्डकी सलिना बुढा मगर उदियमान खेलाडी हुँदै २० हजार रुपैयाँसँगै ट्रफी हात पारिन् ।

एपीएफकी रेश्मा भण्डारी उत्कृष्ट स्पाइकर, एपीएफकै उषा कुमारी विष्ट उत्कृष्ट ब्लकर, पुलिसकी कमला पुन उत्कृष्ट सेटर, डायमन्डकी एन्जिला प्रधान उत्कृष्ट लिवेरो र पुलिसका रुपेश कुमार विष्ट उत्कृष्ट प्रशिक्षक चुनिए । उनीहरुले समान १० हजार रुपैयाँ र शिल्ड हात पारे ।

प्रतियोगितामा आयोजक न्यु डायमन्डसहित एपीएफ क्लब, पुलिस क्लब र परोपकार आदर्श मावि गरी चार टिमको सहभागिता रहेको थियो ।

प्रतियोगिताको मुख्य उद्देश्य न्यू डायमन्ड स्पोर्ट्स क्लबको आफ्नै भलिबल कोर्ट निर्माण सहयोगार्थ रहेकाले पुरस्कार बापतको २० प्रतिशत आयोजक न्यू डायमन्डलाई दिनुपर्नेछ ।

विजयी टोली तथा खेलाडीलाई बागमती प्रदेशका युवा तथा खेलकुद मन्त्री रत्न प्रसाद ढकाल, उपाध्यक्ष हिक्मत थपलिया, क्लबकी अध्यक्ष सुनकेशरी माली, नेपाल भलिबल संघका महासचिव जितेन्द्र बहादुर चन्दलगायतले पुरस्कृत गरे ।